Mədəniyyət siyasəti

Mədəniyyət siyasəti

Əbülfəs Qarayev Azərbaycan mətbuatının 135 illik yubileyi münasibəti ilə jurnalistləri fəxri fərmanla təltif edib – FOTOSESSİYA

Əbülfəs Qarayev Azərbaycan mətbuatının 135 illik yubileyi münasibəti ilə jurnalistləri fəxri fərmanla təltif edib – <font color=red>FOTOSESSİYA </font>

09 iyul 2010 10:16 (UTC +04:00)

Bakı-APA. Bu gün Mirzə Fətəli Axundov adına Milli Kitabxanada Mədəniyyət və Turizm Nazirliyi Azərbaycan mətbuatının yaradılmasının 135 illiyinə həsr olunmuş tədbir və yubiley münasibəti ilə yerli KİV-də mədəniyyət sahəsində seçilən jurnalistlərin mükafatlandırılması mərasimi keçirilib. APA-nın məlumatına görə, tədbirdə çıxış edən mədəniyyət və turizm naziri Əbülfəs Qarayev 135 illik tarixə malik olan Azərbaycan mətbuatına nəzərə salıb. Nazir bildirib ki, rəhbərlik etdiyi qurum mətbuatı özünə dost hesab edir: “Düşünürəm ki, biz mətbuatın yaxın dostuyuq, dost tərəfindən edilən tənqid daha qəbul edilir və hər zaman həll edilir. Çox sevindirici haldır ki, Azərbaycan dövləti mətbuatımıza xüsusi diqqət göstərir və jurnalistlərin əməyi qiymətləndirilir. Azərbaycan mətbuatında çalışan hər bir qələm sahibini, xüsusilə mədəniyyət və turizm sahəsində bizimlə əməkdaşlıq edən jurnalistləri təbrik edirəm”. Ə. Qarayev eləcə də, son illər Azərbaycan qəzetçilik sahəsində poliqrafiya və nəşriyyat işində irəliləyişlər olduğunu yüksək qiymətləndirib.

Tədbirdə millət vəkili, “Ədalət” qəzetinin baş redaktoru Aqil Abbas, “525-ci qəzet”in baş redaktoru Rəşad Məcid və başqaları çıxış ediblər. Rəşad Məcid Azərbaycan mətbuatında mədəniyyət sahəsinin son səhifədən ön səhifəyə keçməsini arzulayıb və bildirib ki, bəşəriyyəti mədəniyyət xilas edəcək.

Beynəlxalq Avrasiya Mətbuat Fondunun rəhbəri, Mətbuat Şurasının üzvü, Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının sədri Umud Rəhimoğlu bu cür tədbirlərin keçirilməsini yüksək qiymətləndirib və ölkə başçısının sərəncamı ilə Azərbaycan mətbuatının 135 illiyi münasibəti ilə silsilə tədbirlərə artıq start verildiyini qeyd edib. Azərbaycan mətbuatının son illər inkişafından da söz açan U. Rəhimoğlu, dövlətin bu sahəyə qayğısını önə çəkib və verilən dəstək sayəsində bu prosesin davam edəcəyini vurğulayıb.

Daha sonra tədbirdə “Mədəniyyət” qəzetinin keçirdiyi “Mədəniyyət sahəsində ən yaxşı jurnalist işi” müsabiqəsinin qalibləri mükafatlandırılıb. Müsabiqədə I yerə Flora Xəlilzadə, II yerə Abdulla Suvar, III yerə Etibar Cəbrayıloğlu, televiziya sahəsində I yerə Vüsalə Quliyeva, II yerə “Salam Azərbaycan” və III “Mədəniyyət saatı” verilişləri layiq görülüb.

Tədbirdə Mədəniyyət və Turizm Nazirliyi ilə sıx əməkdaşlı görə bir qrup jurnalist də fəxri fərman və pul mükafatı ilə təltif olunublar. Təltif olunanlar arasında APA-nın əməkdaşı Ülkər Qasımova və lent.az xəbər portalının əməkdaşı Xəyalə Muradlı da var.