Mədəniyyət siyasəti

Ana səhifə

Mədəniyyət siyasəti

Şəmkir qalasında aparılan arxeoloji qazıntılarla bağlı mətbuat konfransı keçirilib - FOTO

Şəmkir qalasında aparılan arxeoloji qazıntılarla bağlı mətbuat konfransı keçirilib - <font color=red>FOTO</font>

19 avqust 2010 16:37 (UTC +04:00)

Şəmkir. Ayxan Hüseynov - APA. Bu gün Şəmkir qalasında KİV nümayəndələrinin iştirakı ilə mətbuat konfransı keçirilib.

APA-nın Qərb bürosunun xəbərinə görə, konfransın məqsədi Şəmkir şəhərinin yerində aparılan arxeoloji qazıntılar haqda ictimaiyyətə məlumat vermək və elmi nəticələri şərh etməkdən ibarət olub.

Şəmkir Arxeoloji Ekspedisiyasının rəhbəri, tarix elmləri doktoru Tarix Dostuyev jurnalistlərə Şəmkir qalası ətrafında aparılan arxeoloji qazıntılar barədə geniş məlumat verib: “Arxeoloji qazıntılara 2006-cı ilin avqust ayından başlanılıb. Bu arxeoloji qazıntılar Azərbaycan Milli Elmlər Akademiyası Arxeologiya və Etnoqrafiya İnstitutunun, Azərbaycan Mədəniyyət və Turizm Nazirliyinin və Regionların İnkişafı İctimai Birliyinin birgə layihəsi üzrə aparılır. Hazırda şəhər yerində yarım hektardan artıq ərazidə arxeoloji qazıntılar aparılıb. Orta əsr Şəmkir şəhər yerinin mədəni təbəqəsinin qalınlığı 5-6 metr təşkil edir. Arxeoloji qazıntılar nəticəsində Şəmkir şəhərinin istehkam tikililəri daha yaxşı öyrənilir. Ekspedisiyanın qarşısına qoyduğu əsas məqsədlərdən biri şəhərin plan quruluşunu dəqiqləşdirmək, xarakterini müəyyənləşdirməkdir”.

T.Dostuyevin sözlərinə görə, arxeoloji qazıntılar zamanı əmək alətləri, silahlar, məişət avadanlıqları, bəzək əşyaları, sikkələr və s. tapılıb: “Buradan həmçinin nadir tapıntılar da üzə çıxarılıb ki, bunlardan zərgər zindanı, pəncərə şüşəsi altında Məhəmməd Peyğəmbərin (ə) ailəsinə yazılmış dua olan şirli qabları göstərmək olar”.

Qeyd edək ki, Şəmkir şəhərinin adı tarixi mənbələrdə ilk dəfə ərəb işğalı ilə əlaqədar çəkilir. Yəni ərəblərin Azərbaycanı işğal etdiyi VII əsrin 40-cı illərində Şəmkir şəhər kimi artıq mövcud olub. Tarixi mənbələrdən məlum olur ki, Şəmkir IX-X əsrlərdə yüksəliş, XII əsrdə çiçəklənmə dövrü keçirib. İpək Yolunun üzərində, müsəlman sivilizasiyası ilə Qərb sivilizasiyasının təmas nöqtəsində yerləşdiyindən, bu şəhər Azərbaycan tarixində mühüm rol oynayıb. Şəhərin dağılması isə monqolların işğalı ilə bağlıdır. Monqollar Azərbaycana ikinci yürüşləri zamanı bir neçə şəhərin inadlı müqaviməti ilə üzləşib ki, bunlardan biri də Şəmkir şəhəri olub. Şəmkirin inadlı müqavimət göstərməsi monqol sərkərdələrini qəzəbləndirmiş, şəhər işğal edildikdən sonra əhalisi qılıncdan keçirilərək şəhər dağıdılmışdı.