Mədəniyyət siyasəti

Ana səhifə

Mədəniyyət siyasəti

Musiqili Komediya Teatrı 101-ci mövsümündə yeni layihələr həyata keçirəcək

27 avqust 2010 13:42 (UTC +04:00)

Bakı. Ülkər Qasımova-APA. Azərbaycan Dövlət Musiqili Komediya Teatrı 101-ci mövsümündə Mədəniyyət və Turizm Nazirliyinin planlarına uyğun olaraq yeni layihələr həyata keçirəcək. Teatrın mətbuat xidmətindən APA-ya verilən məlumata görə, bu layihələrə xaricdən rejissorların dəvət olunması, yeni tamaşaların hazırlanması və teatrın 100 illik yubileyinin kecirilməsi daxildir. Bu günlərdə teatrda yeni tamaşalar üzərində məşqlərə başlanılacaq. İlk dəfə 1910-cu ildə səhnələşdirilən “Ər və arvad” tamaşası 100 il sonra yenidən tamaşaçıların ixtiyarına veriləcək. Bu tamaşanın rejissoru Yusif Əkbərov, dirijoru əməkdar incəsənədt xadimi Nazim Hacıəlibəyov, rəssamı Eldar Qurbanovdur.

Rollarda xalq artistləri Afaq Bəşirqızı, Yaşar Nuri, İlham Namiq Kamal, Fatma Mahmudova, Arif Quliyev, əməkdar artistlər Elçin Həmidov, Əkbər Əlizadə, aktyorlar Gülcahan Salamova, Ülviyyə Əliyeva, Əliməmməd Novruzov, Emma Məlikova, Agaxan Şərifov cıxış edəcəklər.

Yeni mövsümdə A. Saqarelinin “Xanuma” əsəri iki dildə Azərbaycan və rus bölməsində tamaşaya qoyulacaq. Tamaşaya quruluş verəcək Tiflisdəki Rustaveli teatrının rejissoru Qoça Kapanadze Gürcüstanın tanınmış rejissorları sırasına daxildir. Tamaşada əsas rollarda xalq artistləri Afaq Bəşirqızı, İlham Namiq Kamal, əməkdar artistlər Xanım Qafarova, Əkbər Əlizadə, Səmayə Musayeva, Elcin Həmidov, Boris Qrafkin, aktyorlar Nərgiz Kərimova, Fərid Əliyev, Əzizağa Əzizov, Ramil Qasımov, Nahidə Orucova, Svetlana Bulax, Marina Litvenenko, Əliməmməd Novruzov çıxış edəcəklər. Bu tamaşanın quruluşcu rəssamı Lomgül Murusidze, qeyim üzrə rəssamlar Ketevan Titişvili və Tamuna Maçaraşvilidir.

Sverdlovsk Dövlət Musiqili Komediya Teatrının baş rejissoru, Rusiyanın xalq artisti, “Qızıl Maska” Milli Mükafatın laureatı, professor Kiril Savelyevic Strejnevin tələbəsi Serqey Yunqans Musiqili Teatrların Beynəlxalq Assosiyasisı tərəfindən tamaşa hazırlamaq üçün Azərbaycan Dövlət Musiqili Komediya Teatrına göndərilib. Serqey Yunqans teatrın rus bolməsində operetta janrının banisi, böyük fransız bəstəkarı Jak Offenbaxın “Kandarakı ər və yaxud toy gecəsində sərgüzəşt” komediyasını səhnələşdirəcək.