Mədəniyyət siyasəti

Ana səhifə

Mədəniyyət siyasəti

Gənc Tamaşaçılar Teatrının direktoru: “Teatr daxilindəki söhbətlərin kənara çıxması yaxşı hal deyil”

02 sentyabr 2010 11:51 (UTC +04:00)

Bunu APA-ya açıqlamasında Dövlət Gənc Tamaşaçılar Teatrının direktoru Mübariz Həmidov deyib. M. Həmidov teatr kollektivinin iki üzvü arasında yaranan bu narazılığı aradan qaldırmağa çalışdıqlarını deyib: “Münasibətlər demək olar ki, normallaşıb. Teatrda çalışanlar, xüsusən də aktyorlar çox kövrək olurlar, kiminsə sözü kiməsə xoş gəlmir. Ancaq bir kollektivdə çalışırsınızsa, mütləq münasibətlər normal olmalıdır. Bu cür məsələlər teatrda sağlam mühitin yaranmasına xələl gətirə bilər. Amma bu cür narazılıqlar teatrlarda hər zaman olub. Bunu böyük problemə çevirib üzərində baş sındırmağa ehtiyac yoxdur. Belə vəziyyət uzun müddət davam edə bilməz. Artıq dünəndən etibarən teatrımızın truppası tam fəaliyyətlə işə davam edir”.

M. Həmidov teatrlarda aparılan köklü islahatların onun rəhbərlik etdiyi Gənc Tamaşaçılar Teatrından başlandığını da xatırladıb: “Bizim teatrın rus bölməsi Rus Dram Teatrına verildi, Gənclər, Kamera teatrları isə Gənc Tamaşaçılar Teatrına birləşdirildi və vahid bir truppa şəklində fəaliyyətə başladıq. Təbii ki, islahatlar olan yerdə narazılıq, giley-güzar olmalıdır. Bədii Şurada bu və ya digər formada mübahisələr, fikir ayrılığı ola bilər, ancaq sonda mütləq ümumi fikrə gəlinməlidir və gəlindi də. Ötən gün biz ümumi truppanı qəbul etdik, ilin sonuna qədər iş planı haqda danışdıq. Ola bilsin ki, kimlərsə narazı qalsın, küskünlük yaransın, ancaq bu islahat başlanıb və davam etdiriləcək. Bizim bu teatrda ortabab, zəif tamaşalar hazırlamağa ixtiyarımız yoxdur. Ən yüksək səviyyədə tamaşalar hazırlamalıyıq. Nazirin əmri ilə Cənnət Səlimova teatra baş rejissor təyin olunub. Baş rejissor yaradıcılığa məsul şəxsdir, yaradıcı insandır və razılaşmışıq ki, onun repertuar siyasəti bu cürdür. Hər hansı rejissor onunla razı deyilsə, ona da izah olunur. İndi tutalım Cənnət Səlimova yeni birləşmiş teatr şəklində fəaliyyət göstərən bu teatrda iki-üç tamaşanı artıq qoyur, nə var burada? Nicat da tamaşa qoydu. Əslində teatrdaxili söhbətlərin kənara çıxması yaxşı hal deyil. Mən bunu dəstəkləmirəm və bu barədə dünən də kollektivə fikirlərimi söylədim. Biz teatrın ən yaxşı işlərini respublika səviyyəsində söyləməliyik. Bunun əvəzinə oturub dedi-qodu ilə məşğul olmaq lazım deyil”.

cənnət_səlimova