Mədəniyyət siyasəti

Ana səhifə

Mədəniyyət siyasəti

Azərbaycan Mədəniyyət və Turizm Nazirliyinin nümayəndə heyəti İordaniyada səfərdə olub

10 sentyabr 2010 10:37 (UTC +04:00)

Bakı-APA. Azərbaycan mədəniyyət və turizm nazirinin müavini Ədalət Vəliyevin rəhbərlik etdiyi nümayəndə heyəti 6-10 sentyabr tarixlərində İordaniyada səfərdə olub. Azərbaycanın İordaniyadakı səfirliyindən APA-ya verilən məlumata görə, səfərin məqsədi ikitərəfli əməkdaşlığın dərinləşdirilməsi və genişləndirilməsi istiqamətində müzakirələr aparmaq, İordaniyada Azərbaycan Mədəniyyəti günlərinin təşkil edilməsi ilə bağlı danışıqlar keçirərək yerli maddi-texniki imkanlarla tanış olmaqdır.

Səfər zamanı Ədalət Vəliyev İordaniyanın turizm və tarixi əsərlər naziri Suzan Afanehlə, mədəniyyət nazirinin müavini Cireys Səmavi ilə, Əmmanda yerləşən Kral Mədəniyyət Mərkəzinin baş direktoru, Milli Kitabxananın baş direktoru, Hüseyn Gənclər Şəhərciyinin və Hüseyn Mədəniyyət Mərkəzinin rəhbərliyi ilə, habelə Zarka şəhərinin Kral II Abdullah Mədəniyyət Mərkəzinin Baş direktoru ilə görüşlər keçirib, iki ölkə arasında mədəniyyət və turizm sahələrində əməkdaşlıq məsələlərini müzakirə edib, gələcəkdə Azərbaycan Mədəniyyət Günləri çərçivəsində tədbirlərin keçirilə biləcəyi müvafiq mədəniyyət ocaqlarının və mərkəzlərinin maddi-texniki bazası və imkanları ilə tanış olub.

Görüşlərdə tərəflər musiqi, rəqs, muzey və kitabxana işi, qarşılıqlı olaraq ədəbi əsərlərin tərcüməsi sahəsində əməkdaşlığın inkişaf etdirilməsi, həmçinin qeyd edilən və digər sahələrdə təcrübə və nümayəndə heyətlərinin mübadiləsi, ustad dərslərinin təşkil edilməsi barədə niyyətlərini ifadə ediblər. Bundan əlavə, tərəflər önümüzdəki aylarda İordaniyada Azərbaycan Mədəniyyəti Günlərinin keçirilməsi, Günlərin konkret tarixlərinin, nümayəndə heyəti ilə bağlı təfsilatların və s. məlumatların diplomatik kanallar vasitəsilə aydınlaşdırılacağı barədə razılığa gəliblər. Hər iki tərəf bu istiqamətdə koordinasiya işlərinin aparılmasını Azərbaycanın Əmmandakı səfirliyinə həvalə edib.

İordaniya rəsmiləri ilə keçirilmiş görüşlərdə nümayəndə heyətini səfir Elman Araslı və səfirliyin əməkdaşları müşayiət edib, səfərin uğurla nəticələnməsi istiqamətində səfirlik tərəfindən müvafiq tədbirlər həyata keçirilib.

Səfər İordaniya KİV-ləri tərəfindən izlənib və keçirilmiş görüşlər, müzakirə edilmiş məsələlər barədə yerli mətbuat səhifələrində müvafiq yazılar və məqalələr, o cümlədən fotoşəkillər dərc olunub.