Mədəniyyət siyasəti

Mədəniyyət siyasəti

Üzeyir Hacıbəylinin “Milli musiqinin əsasları” dərsliyinin təqdimatı keçirilib

17 sentyabr 2010 10:52 (UTC +04:00)

Bakı. Ülkər Qasımova – APA. Bu gün Bakı Caz Mərkəzində müasir Azərbaycan bəstəkarlıq məktəbinin banisi Üzeyir Hacıbəylinin “Milli musiqinin əsasları” dərsliyinin təqdimatı keçirilib. APA-nın məlumatına görə, təqdimat mərasimində çıxış edən Üzeyir Hacıbəyli adına Bakı Musiqi Akademiyasının (BMA) rektoru, xalq artisti Fərhad Bədəlbəyli Azərbaycan musiqisi üçün çox vacib olan bu kitabın indiyə kimi öz aktuallığını itirmədiyini vurğulayıb. O, kitabın nəşrinə görə təhsil naziri Misir Mərdanova minnətdarlığını bildirib. Kitab həm də elektron formatda hazırlanıb və DVD-dən ibarətdir. “Musiqi Dünyası” jurnalının baş redaktoru, eləcə də diskin hazırlanmasında iştirak edən Tariyel Məmmədov isə deyib ki, kitabın elektron formatda buraxılması böyük işdir, çünki bu, XXI əsrin müasir yanaşmasıdır.

Tədbirdə o da bildirilib ki, dərslik Azərbaycan dilində nəşr olunub. Diskə isə həm rus, həm də ingilis versiyaları daxil edilib. Bu, multi-media dərsliyi hesab olunur. Nəşr müasir didaktik materiallar və mətinlərlə təchiz olunub.
Qeyd edək ki, layihə Üzeyir Hacıbəylinin anadan olmasının 125 illik yubileyi münasibəti ilə həyata keçirilib.

Üzeyir Hacıbəyli-125