Mədəniyyət siyasəti

Ana səhifə

Mədəniyyət siyasəti

“Üzeyir Hacıbəyli-125” Beynəlxalq Musiqi Festivalında iştirak edən ABŞ və Rusiya musiqiçiləri Üzeyir Hacıbəylini tanımadıqlarını bildiriblər

21 sentyabr 2010 07:20 (UTC +04:00)

Bakı. Ülkər Qasımova – APA. Bakıda “Üzeyir Hacıbəyli-125” Beynəlxalq Musiqi Festivalı davam edir. APA-nın məlumatına görə, artıq üç gündür davam edən beynəlxalq festivalda 10-a yaxın ölkənin musiqiçiləri təmsil olunur. Ancaq təəssüfləndirici hal odur ki, Üzeyir Hacıbəylinin adını daşıyan bu festivalda iştirak edən bir neçə əcnəbi musiqiçi Azərbaycan bəstəkarını tanımadıqlarını bildiriblər.

Sentyabrın 20-də Azərbaycan Dövlət Filarmoniyasında keçirilən “Royalın təntənəsi” pianoçular kvarteti konsertində çıxış edən amerikalı David Liveli, eləcə də onunla bir səhnəni paylaşan rusiyalı pianoçular Aleksandr Gindin, Sergey Kudryakov dahi bəstəkarı tanımadıqlarını etiraf ediblər. Konsertdə iştirak edən mədəniyyət və turizm naziri Əbülfəs Qarayev jurnalistlərin bu mövzuda sualını cavablandırıb: “Bu cür festivalları keçirməkdə məqsədimiz odur ki, əcnəbi musiqiçilər ölkəmizə gəlib Azərbaycan mədəniyyəti ilə daha yaxından tanış olsunlar. Eləcə də Azərbaycan bəstəkarlarının əsərlərini bizim musiqiçilərlə bərabər öyrənib bu əsərləri öz repertuarlarına daxil etsinlər. Buraya gələn beynəlxalq səviyyədə tanınan və qəbul olunmuş ifaçılar artıq Azərbaycanın musiqisini daha dərindən öyrənirlər”.

üzeyir_hacıbəyli