Mədəniyyət siyasəti

Mədəniyyət siyasəti

Azərbaycan Dövlət Akademik Milli Dram Teatrı ilə Təhsil Nazirliyinin birgə layihəsi çərçivəsində ilk tədbir keçirilib

20 oktyabr 2010 13:52 (UTC +04:00)

Bakı. Ülkər Qasımova – APA. Azərbaycan Təhsil Nazirliyi və Azərbaycan Dövlət Akademik Milli Dram Teatrının birgə layihəsi çərçivəsində ilk tədbiri keçirilib. APA-nın məlumatına görə, tədbir 31 saylı orta məktəbdə baş tutub. Tədbirdə teatrın aktyorlarından xalq artistləri Hacı İsmayılov, Ramiz Məlik, Azər Mirzəyev, Zemfira Nərimanova iştirak edib. İki saata yaxın davam edən görüşdə məktəb şagirdləri onları maraqlandıran suallara cavab tapmağa çalışıblar. Aktyorlar isə çıxışlarında məktəb illərində başlarına gəlmiş maraqlı əhvalatlardan, eləcə də teatr və kino sahəsindəki uğurlarından və gələcək planlarından söz açıblar.

Xalq artisti Zemfira Nərimanova APA-ya açıqlamasında görüşün keçirilməsindən məmnunluğunu ifadə edib: “Uzun müddətdir ki, bu cür görüşlərin keçirilməsinin həsrətindəyik. Buraya gələndə görüşün çox məsuliyyətli olduğunu hiss etdim. Xeyli illər əvvəl bizdə bu cür görüşlər tez-tez keçirilirdi. Uşaqlar bizim cəmiyyətin gələcəyidir, əgər illər sonra bugünkü söhbətimizdən burada iştirak edən uşaqların beyinlərində nə isə qalacaqsa və xatırlayacaqlarsa, deməli, biz nə isə etmiş oluruq. Ümidvaram ki, gələcəkdə bu görüşü xatırlayan da məni də yada salacaqlar”.
Z. Nərimanova onu da bildirib ki, görüşün keçirildiyi 31 saylı məktəbdə Azərbaycan teatrının görkəmli simaları Həsənağa Turabov, Ramiz Məlikov, Həsən Əbluc və Azərbaycan Dövlət Akademik Milli Dram Teatrının direktoru İsrafil İsrafilov təhsil alıblar.

Qeyd edək ki, layihə çərçivəsində ikinci belə görüşün oktyabrın 25-də Tibb Kollecində keçirilməsi nəzərdə tutulur.