Mədəniyyət siyasəti

Mədəniyyət siyasəti

Bakıda Beynəlxalq Çexov Festivalının “İpək yolu” mərhələsi başlayır

11 noyabr 2010 11:41 (UTC +04:00)

Bakı. Ülkər Qasımova – APA. Noyabrın 12-də Bakıda Çexov adına Beynəlxalq Teatr Festivalının “İpək Yolu” mərhələsi keçiriləcək. APA-nın məlumatına görə, festivalla bağlı keçirilən mətbuat konfransında Çarli Çaplinin nəvəsi Aureliya, fransalı aktyor Ceymi Martinos, Çexov Festivalının vitse-prezidenti Mariya Malkina, prodüser Fredirik Russo, Azərbaycan Teatr Xadimləri İttifaqının rəhbəri Azərpaşa Nemətov və “Procent” şirkətinin baş direktoru Ələkbər Tağızadə iştirak edib.

Azərpaşa Nemətov Azərbaycan paytaxtında keçiriləcək bu festivalın əhəmiyyətindən danışıb və Bakı səhnəsində Fransa, Kanada və Belarus teatr kollektivlərinin çıxış edəcəyini deyib. O, Çexov Festivalının “İpək yolu” mərhələsinin prezident İlham Əliyevin imzaladığı “Azərbaycan teatrı 2009-2019-cu illərdə” Dövlət Proqramına əsasən təşkil olunduğunu bildirib.

Festivalının vitse-prezidenti Mariya Malkina Azərbaycanın festivalın “İpək yolu” layihəsini həyata keçirməsindən məmnunluğunu dilə gətirib. Festival çərçivəsində nümayiş olunacaq ilk tamaşa - “Aureliyanın oratoriyası” barədə məlumat verən Malkinanın sözlərinə görə, tamaşanın quruluşçu rejissoru, konsepsiya müəllifi və səhnə tərtibatçısı Çarli Çaplinin qızı - Aureliyanın anası Viktoriya Tyeredir. “Yeni sirk” janrına aid edilən, teatr və sirk elementlərinin sintezindən ibarət tamaşada klounada, sirk tryukları, illüzionizm, rəqs, pantomim və kukla teatr elementləri yer alıb: “Söz, danışıq olmayan bu tamaşanı hamı başa düşə bilər. “Aureliyanın oratoriyası” 2009-cu ildə Moskvada nümayiş olundu. Hələ belə anşlaq görməmişdik. Moskva tamaşaçıları o aktyorlara vurulmuşdu. Çox ümid edirəm ki, Azərbaycan tamaşaçıları da o cür xoş təəssüratlar qazanacaqlar”.

Çarli Çaplinin nəvəsi, tamaşanın əsas obrazının ifaçısı Aureliya Tyere də anasının məhz onun üçün hazırladığı bu tamaşa haqqında məlumat verib. O, anasının hazırda digər ölkədə turnedə olduğu üçün Azərbaycana gələ bilmədiyini söyləyib.

Qeyd edək ki, “Aureliyanın oratoriyası” noyabrın 12, 13 və 14-də Rus Dram Teatrının səhnəsində nümayiş olunacaq. Festivalın proqramına daxil olan digər iki tamaşa Belarusun “Toy”, Kanadanın “Yağış” tamaşalarıdır.

Festival Mədəniyyət və Turizm Nazirliyi, Azərbaycan Teatr Xadimləri İttifaqı və “Procent” şirkəti, həmçinin Beynəlxalq Teatr İttifaqları Konfederasiyası tərəfindən təşkil olunub.