Mədəniyyət siyasəti

Mədəniyyət siyasəti

Bakıda Vokalçıların Bülbül adına V Beynəlxalq Müsabiqəsi keçiriləcək

12 noyabr 2010 13:32 (UTC +04:00)

APA-nın müsabiqənin saytına istinadən yaydığı xəbərə görə, beynəlxalq müsabiqə Mədəniyyət və Turizm Nazirliyi və Bülbül Fondunun birgə təşkilatçılığı ilə keçiriləcək.

Müsabiqədə dünyanın bir çox ölkələrindən tenorlar və vokalçıların iştirak edəcəyi gözlənilir. Beynəlxalq müsabiqənin qran-pri sahibi 10 000 ABŞ dolları, I yerin sahibi 5 000 ABŞ dolları, II yerin sahibi 3 000 ABŞ dolları, III yerin sahibi 2 000 ABŞ dolları, IV yerin sahibi isə 1 000 ABŞ dolları məbləğində pul mükafatı və nominasiyalar üzrə diplomlarla təltif olunacaqlar. “Yaxşı tenor”, “Bülbülün repertuarından olan Azərbaycan bəstəkarlarının əsərlərinin yaxşı ifasına görə”, “Xalq mahnısının yaxşı ifasına görə” və “Yaxşı akkompanementə görə” xüsusi mükafatlara layiq görülən konsertmeysterlərə 3 pul mükafatı da veriləcək. Müsabiqə noyabrın 21-dək davam edəcək.

Müsabiqənin münsiflər heyətinin sədri SSRİ xalq artisti, Lenin mükafatı laureatı, Sosialist Əməyi Qəhrəmanı olmuş professor Yevqeni Nesterenkodur. Təşkilat Komitəsinin sədrliyini isə mədəniyyət və turizm naziri Əbülfəz Qarayev həyata keçirir.