Mədəniyyət siyasəti

Mədəniyyət siyasəti

Londonda Azərbaycana həsr olunmuş “Uçan xalça ilə nağıllara” adlı sərgi keçirilib

22 noyabr 2010 08:17 (UTC +04:00)

Bakı - APA. Noyabrın 15-dən 21-dək Londonda Azərbaycan xalçalarına həsr olunmuş “Uçan xalça ilə nağıllara” adlı sərgi keçirilib. Avropa Azərbaycan Cəmiyyətindən APA-ya verilən məlumata görə, sərgidə 380-ə yaxın yüksək səviyyəli qonaq, o cümlədən Lord Mendelson, Lord Braun, Türkiyənin Britaniyadakı səfiri Ünal Çeviköz, Azərbaycanın Britaniyadakı səfiri Fəxrəddin Qurbanov, Belarusun Britaniyadakı səfiri Aleksan Mikneviç, Ukraynanın Britaniyadakı səfiri Vladimir Xandoqiy, Koreyanın Britaniyadakı səfiri Kyu Ho Çu iştirak edib. Sərgi Heydər Əliyev Fondu, Azərbaycanın Britaniyadakı səfirliyi və “Bakı” jurnalı tərəfindən təşkil olunub.

Mərasimin əvvəlində Heydər Əliyev Fondunun Rusiyadakı nümayəndəliyinin rəhbəri Leyla Əliyevanın müraciəti oxunub. Müraciətdə deyilir: “Sərginin məqsədi sizi Azərbaycanın nağıl dünyasına aparmaqdır. Bizə tez-tez deyirlər ki, şərq şərqdir, qərb də qərb və onlar heç vaxt görüşməyəcəklər. Amma Azərbaycanda şərqlə qərb birləşir. Ümid edirik ki, bu axşam burada həmin atmosferi yaradacağıq. 1918-ci ildə şərqdə ilk demokratik respublika olan Azərbaycan Respublikası elan olundu və bu respublika qadınlara seçki hüququ verdi. Şərqdə ilk opera teatrı və konsert zalları da Azərbaycanda tikilib. Qısa desək, Azərbaycan şərqi qərbə təqdim etdi və bütün Avropa Azərbaycan xalça dünyası ilə tanış olmaq üçün bura gəldi. Mədəniyyətlərin və dəyərlərin mübadiləsi bu gün də davam edir. Xalçalar bizim milli kimliyimizin bir parçasıdır. Qoy bu möcüzəli xalçalar sizi qərbdən şərqə aparsın”.

Tədbirdə səfir Fəxrəddin Qurbanov, Britaniya-Azərbaycan Cəmiyyətinin sədri Lord Freyzer, Britaniyanın rabitə, mədəniyyət və yaradıcı sənaye naziri Ed Veyzey çıxış ediblər.

Rəsmi hissədən sonra qonaqlar xalçalarla bəzədilmiş qalereyaya eniblər. Burada onlar Azərbaycan mətbəxinin ləziz yeməklərindən və içkilərindən dadıb, xalça toxuma prosesini izləyib və Azərbaycan muğamlarını dinləyiblər. Sərgidə yeddi xalça məktəbinin nümunələri təqdim olunub. Yarpaq şəkilli ornamentlərlə bəzədilmiş Qarabağ xalçaları xüsusi diqqət çəkib. Bu xalçalar indi erməni işğalı altında olan Dağlıq Qarabağda toxunub.