Mədəniyyət siyasəti

Mədəniyyət siyasəti

Azərbaycan Belarusla mədəniyyət sahəsində əməkdaşlığı genişləndirəcək

22 noyabr 2010 10:15 (UTC +04:00)

Bakı. Ülkər Qasımova-APA. Mədəniyyət və turizm nazirinin müavini Sevda Məmmədəliyeva Belarusda səfərdədir. APA-nın məlumatına görə, nazir müavini “Belta”ya müsahibəsində Azərbaycanın Belarusla mədəniyyət sahədə əməkdaşlığı genişləndirmək niyyətində olduğunu bildirib və Belarusla birgə kinofilmlər çəkmək, teatr və musiqi sənəti sahəsində geniş əməkdaşlıq etmək niyyətlərini açıqlayıb: “Əldə olunmuş nailiyyətlərlə kifayətlənmək olmaz. Əgər Belarus Dövlət Akademik Musiqi Teatrı Üzeyir Hacıbəylinin “Arşın mal alan” musiqili komediyasına belə gözəl quruluş verə bilibsə, bu təcrübə nəzərə alınmalıdır. Bu tamaşanın Azərbaycan Dövlət Akademik Opera və Balet Teatrının baş rejissoru Hafiz Quliyevin iştirakı ilə qoyulması da bu əməkdaşlıq üçün təqdirəlayiq haldır. Xalqlarımız arasındakı mədəni kontaktlar çox önəmlidir”.

Nazir müavini həmçinin bildirib ki, Belarus Azərbaycanın mədəni həyatında aktiv iştirak edir. O, dekabrın əvvəllərində Bakıda keçiriləcək Mstislav Rostroviç adına IV beynəlxalq musiqi festivalında Belarus nümayəndələri də iştirak edəcəyini diqqətə çatdırıb. Daha birgə layihə kimi isə o, Belarus-Azərbaycan və Litvanın təşəbbüsü ilə daun sindromundan əziyyət çəkən uşaqların incəsənəti mənimsəməsi ilə bağlı həyata keçirilən layihəni qeyd edib.

S. Məmmədəliyeva bu birgə layihənin Avropa İttifaqı tərəfindən dəstəkləndiyini vurğulayıb. Bu layihədə iştirak edəcək üç ölkədən olan daun sindromundan əziyyət çəkən uşaqlar öz ölkələrində incəsənət muzeyləri ilə tanış olacaq və gördüklərini öz rəsmlərində əks etdirəcəklər. Layihə çərçivəsində həmçinin, həmin rəsm əsərlərindən ibarət sərgilərin layihəyə üzv olan ölkələrdə də təşkili nəzərdə tutulur.