Mədəniyyət siyasəti

Ana səhifə

Mədəniyyət siyasəti

“Arşın mal alan” tamaşasının Belarusda nümayişi anşlaqla keçib

27 noyabr 2010 12:40 (UTC +04:00)

Bakı. Ülkər Qasımova – APA. Belarus Dövlət Akademik Musiqili Teatrında səhnəyə qoyulan Üzeyir Hacıbəylinin “Arşın mal alan” musiqili operettasının nümayişi anşlaqla keçib. Bunu APA-ya açıqlamasında bu günlərdə Belarusdan səfərdən qayıdan Azərbaycan Dövlət Akademik Opera və Balet Teatrının baş rejissoru, əməkdar incəsənət xadimi Hafiz Quliyev deyib: “Bu tamaşa Azərbaycan və Belarus arasında beynəlxalq layihə əsasında həyata keçirilib. Bu layihə hər iki dövlətin Mədəniyyət nazirlikləri, Azərbaycan Opera və Balet Teatrı və Belarus Musiqili Teatrı, eləcə də iki ölkənin səfirliklərinin təşəbbüsü ilə baş tutub. Oktyabrın 17-də mən həmin teatrda bu tamaşanın quruluşuna başladım. Bu günlərdə isə artıq premyerası baş tutub və olduqca böyük ajiotaj yaradıb”.

H.Quliyev bildirib ki, “Arşın mal alan” Belarus teatrında rus dilində səhnəyə qoyulub və tamaşanın premyerasında Azərbaycanın mədəniyyət və turizm nazirinin müavini Sevda Məmmədəliyeva, Azərpaşa Nemətov, Sərdar Fərəcov, səfirliyin nümayəndələri, eləcə də Belarusun mədəniyyət naziri, musiqili xadimləri iştirak ediblər. H.Quliyev qeyd edib ki, üç günlük premyeranın hər biri anşlaqla keçib. Tamaşalardan birində baş rollar – Gülçohrə və Əsgər partiyalarının azərbaycanlı solistləri İnarə Babayeva və Fərid Əliyev ifa ediblər. Digər iki tamaşanı isə bütünlüklə Belarus aktyorları oynayıblar.

Belarus Dövlət Akademik Musiqili Teatrda səhnəyə qoyulan «Arşın mal alan» tamaşasının quruluşçu rejissoru Hafiz Quliyev, rəqslərin quruluşçusu Mədinə Əliyeva olub. Tamaşanın digər məsuliyyətli işlərini belaruslu teatr xadimləri həyata keçiriblər: “Gündəlik olaraq səkkiz saat məşq edirdik. Azərbaycan mədəniyyət nümunəsinə belaruslu aktyorlar çox ürəklə, sevgi ilə yanaşıblar. Tamaşanın dekorasiyasında Azərbaycanın mədəniyyəti, mədəni obyektləri, tarixi abidələri əks olunub. Eyni zamanda aktyorlar milli geyimlərdə səhnəyə çıxıblar”. Hər üç tamaşanın sonunda izləyicilər bu sənət nümunəsini 15 dəqiqə alqışlayıblar. H.Quliyev onu da bildirib ki, bu əməkdaşlıqdan sonra Belarusun mədəniyyət naziri Azərbaycanla yeni layihələrlə bağlı işbirliyi qurmağı arzuladıqlarını deyib.

“Arşın mal alan” tamaşası hazırda Hafiz Quliyev tərəfindən Çin dilində Pekin Teatrında səhnələşdirilir.