Mədəniyyət siyasəti

Mədəniyyət siyasəti

Berlindəki Humboldt Universitetində “Azərbaycan müxtəlif mədəniyyətlərin təmas nöqtəsidir” mövzusunda elmi konfrans keçirilib

02 dekabr 2010 22:15 (UTC +04:00)

Bakı-APA. Dekabrın 2-də Almaniyanın paytaxtındakı məşhur Humbold Universitetində “Azərbaycan müxtəlif mədəniyyətlərin təmas nöqtəsidir” mövzusunda elmi konfrans keçirilib. Almaniyada Azərbaycan Elm və Mədəniyyət Həftəsi çərçivəsində keçirilən elmi konfransın işində AFR, Azərbaycan və bir sıra ölkələrdən olan alimlər iştirak edib. Bu ərəfədə həmin Universitetdə İçərişəhərə və Qafqaz Albaniyasının mədəni irsinə həsr edilmiş eyniadlı fotosərginin açılışı olub. Bu barədə APA «Azərtac»a istinadən məlumat verir.

Konfransın işi üç seksiyada aparılıb. Birinci seksiya Qafqaz Albaniyasının tarixi və memarlığı, onun Azərbaycanda islam memarlıq ənənələrinə təsiri mövzusuna həsr edilib. Bu seksiyada AMEA-nın müxbir üzvü, Əməkdar Elm Xadimi, AMEA Tarix İnstitutunun tarixi coğrafiya şöbəsinin müdiri, Azərbaycan Aviasiya Akademiyasının humanitar elmlər kafedrasının müdiri Fəridə Məmmədova “Qafqaz Albaniyası və Alban Apostol avtokefal kilsəsi” mövzusunda, AMEA-nın Arxeologiya və Etnoqrafiya İnstitutunun şöbə müdiri Qoşqar Qoşqarlı “Antik dövr Qafqaz Albaniyasının tarixinin öyrənilməsində arxeologiyanın rolu” mövzusunda, AMEA Tarix İnstitutunun elmi işçisi Ülviyyə Hacıyeva “XIX əsrdə alban katolikosluğunun – patriarxlığının ləğv edilməsi” mövzusunda, Vyana Universitetinin İncəsənət Tarixi institutunun əməkdaşı Anneqred Plontke-Lyuninq, memarlıq doktoru, Azərbaycan Memarlıq-İnşaat Universitetinin rektoru, professor Gülçöhrə Məmmədova “Orta əsr Azərbaycan memarlıq aspektləri və memarlıq irsinin mühafizəsi problemləri”, Azərbaycan Memarlıq-İnşaat Universitetinin memarlıq konstruksiyaları və abidələrin bərpası kafedrasının dosenti Səbinə Hacıyeva “Qafqaz Albaniya-Azərbaycan dini memarlığında xristian və müsəlman motivlərinin simbiozu”, Azərbaycanın Polşadakı Fövqəladə və səlahiyyətli səfiri Həsən Həsənov “Bakı tarixində bütpərəstlik dövrü (Qız qalası haqqında)” mövzularında məruzələrlə çıxış ediblər.
Fəridə Məmmədova “Qafqaz Albaniyası və Alban Apostol Avtokefal kilsəsi” mövzusunda məruzəsində vurğulamışdır ki, Qarabağ münaqişəsi başlayandan dərhal sonra – 1989-cu və 1991-ci illərdə Almaniya elmi ictimaiyyəti Qafqaz Albaniyasına həsr edilmiş konfrans keçirən ilk elmi birlik olub.

Konfransın ikinci seksiyası Şərq poeziyası və orta əsrlərdə Azərbaycan ədəbiyyatı məsələlərinə həsr edilib. Bu seksiyada Berlin Azad Universitetinin professoru, doktor Mixael Raynhard Hess “İmadəddin Nəsiminin ədəbi fəaliyyətinin tədqiqində yeni nəticələr”, türkiyəli professor Fatih Usluer “Azərbaycan ədəbiyyatında hürufilik”, Bakı Slavyan Universitetinin professoru Rəhilə Qeybullayeva “Azərbaycan milli identikliyinin formalaşmasında orta əsrlər ədəbiyyatının rolu” mövzusunda məruzələrlə çıxış ediblər.

Tədbirin üçüncü hissəsində tarix elmləri namizədi Zaur Həsənovun “Çar skifləri: Çar skiflərinin və qədim oğuzların etnik-dil identifikasiya” (İstanbul, 2009) və professor Mixael Raynhard Hessin “İmadəddin Nəsiminin ədəbi fəaliyyəti haqqında” (Aahen, 2009) əsərlərinin təqdimatı olub.

Almaniyada Azərbaycan Elm və Mədəniyyət Həftəsi öz proqramını davam etdirir.