Mədəniyyət siyasəti

Ana səhifə

Mədəniyyət siyasəti

Pianoçuların Qara Qarayev adına I Beynəlxalq elmi-ifaçılıq müsabiqəsinin açılışı olub - FOTO

Pianoçuların Qara Qarayev adına I Beynəlxalq elmi-ifaçılıq müsabiqəsinin açılışı olub - <font color=red>FOTO</font>

06 dekabr 2010 14:01 (UTC +04:00)

Bakı. Ülkər Qasımova – APA. Üzeyir Hacıbəyli adına Bakı Musiqi Akademiyasında Qara Qarayev adına pianoçuların I Beynəlxalq elmi-ifaçılıq müsabiqəsi və pianoçuların “Fortepiano Qara Qarayev yaradıcılığında” I Beynəlxalq elmi-ifaçılıq konfransı başlayıb. APA-nın məlumatına görə, tədbirlər Bakı Musiqi Akademiyasının 90 və akademiyanın orta ixtisas musiqi məktəb-studiyasının 30 illiyinə həsr olunub.

Açılış mərasimində çıxış edən BMA-nın rektoru, xalq artisti Fərhad Bədəlbəyli bildirib ki, müsabiqə və konfransın 2010-cu ili “Mədəniyyətlərin beynəlxalq yaxınlaşması ili” elan edən UNESCO-nun himayəsi altında keçirilməsi ilə əlaqədar olaraq müsabiqənin şərtlərindən biri iştirakçılar tərəfindən Qara Qarayevin əsərləri ilə yanaşı, öz ölkələrinin əsərlərini də ifa etmələridir.

Açılışda BMA-nın dosenti Mədinə Tuayevanın ssenarisi əsasında çəkilən “Söz və musiqi” filmi də nümayiş etdirilib. Film BMA-da hazırlanıb keçirilən elmi-ifaçılıq müsabiqəsi və konfransların tarixi haqqındadır. Layihənin müəllifi əməkdar incəsənət xadimi, professor Tərlan Seyidovdur. Onun sözlərinə görə, iştirakçılar arasında beynəlxalq müsabiqələrin qaliblərinin və milli mükafatların sahiblərinin olması müsabiqənin yüksək səviyyəsindən xəbər verir: “Müsabiqənin müsbət cəhəti ABŞ, Rusiya, Gürcüstan, Türkiyə, Qırğızıstan, Küveyt, Tatarıstan, Özbəkistan və Türkmənistandan olan pianoçular sayəsində Qara Qarayevin fortepiano musiqisinin interpretatorları və tədqiqatçılarının sayının artması olacaq”.

Qeyd edək ki, dekabrın 6-dan 10-na qədər davam edəcək müsabiqə və konfrans Bakı Musiqi Akademiyasının Qara Qarayev adına böyük zalında və konfrans zalında keçiriləcək. Birinci qrup iştirakçılar üçün 10-16 yaş həddi, ikinci qrup üçün 17-30 yaş həddi müəyyən olunub. Qaliblər dekabrın 10-da elan olunacaq və mükafatlandırılacaq.