Mədəniyyət siyasəti

Ana səhifə

Mədəniyyət siyasəti

Dövlət Pantomim Teatrının iki aktyoru teatrı tərk edib

09 dekabr 2010 10:41 (UTC +04:00)

Bakı. Ülkər Qasımova – APA. Azərbaycan Dövlət Pantomim Teatrının aktyorları, əməkdar artist Pərviz Məmmədrzayev və Qurban Məsimov teatrı tərk ediblər. Bu barədə APA-ya məlumat verən Pantomim Teatrının direktoru Elman Rəfiyev deyib ki, bu addım aktyorların öz seçimi olub: “Mən, Pantomim Teatrının ilk truppasının üzvlərindən və aparıcı aktyorlarından biri Qurban Məsimov və əməkdar artist, prezident mükafatçısı Pərviz Məmmədrzayev məşhur “üçlük” idik. Bizim teatr bu “üçlük”lə tanınırdı. Ancaq həmin üç nəfərdən ikisi teatrı öz istəkləri ilə tərk edib”.

E. Rəfiyev bildirib ki, Dövlət Pantomim Teatrının yaradıcısı, əməkdar incəsənət xadimi Bəxtiyar Xanızadə aktyorların gedişini normal qarşılayıb: “Bəxtiyar Xanızadə aktyorların teatrdan getməsini labüd hal kimi qiymətləndirdi. Pantomim Teatrı yarananda Bəxtiyar Xanızadə demişdi ki, gələn-gedən üçün teatrımızın qapısı hər zaman açıqdır və kim özündə nəsə irəliləyiş hiss eləsə, biz onu zorla saxlaya bilmərik. Etiraf edək ki, Qurban Məsimovun bizim teatr üçün əməyi əvəzolunmazdır. Biz “üçlük” olaraq hər zaman küçədə gedəndə bizə adımızla deyil, pantomim deyə müraciət edirdilər”.

E. Rəfiyevun sözlərinə görə, 16 il bu teatrda çalışan hər iki aktyor heç kimlə mübahisə etməyib: “Onlar qətiyyən hansısa mübahisə səbəbindən işdən çıxmayıblar. Çünki bizim aramızda belə hal baş verə bilməzdi. Onlar sakit şəkildə Bəxtiyar Xanızadəyə yaxınlaşaraq dedilər ki, biz işdən çıxmaq istəyirik”.

Teatr rəhbəri qeyd edib ki, P. Məmmədrzayev özü də pantomim qrupu yaradıb: “Həmin qrupda onun öz tələbələri var və onları hazırlaşdırır. Əslində belə də olmalıdır. Çünki biz Bəxtiyar Xanızadə məktəbi keçmişik. Bu məktəbdən öyrəndiklərimizi isə kimlərəsə ötürməliyik”.

Qurban Məsimovun sırf reklama görə teatrdan uzaqlaşması iddialarına da aydınlıq gətirən direktor bu informasiyanın doğru olmadığını açıqlayıb və onun həmin şirkətlə bir illik müqaviləsi olduğunu deyib. E. Rəfiyev bu halların hazırda Azərbaycan teatrlarında aparılan islahatlarla heç bir əlaqəsi olamadığını vurğulayıb: “Artıq mənim gözümün qarşısında üçüncü truppadır ki, dağılır. Buna baxmayaraq, mən həmin Elmanam və hazırda da bu teatrda işləyirəm”.

Pantomim_Teatr