Mədəniyyət siyasəti

Ana səhifə

Mədəniyyət siyasəti

Beynəlxalq Muğam Festivalına həsr olunmuş mətbuat konfransı keçirilib - FOTO

Beynəlxalq Muğam Festivalına həsr olunmuş mətbuat konfransı keçirilib - <font color=red>FOTO </font>

27 yanvar 2011 10:12 (UTC +04:00)

Bakı. Ülkər Qasımova – APA. Azərbaycan Bəstəkarlar İttifaqında martın 14-dən 21-nə qədər Bakıda təşkil olunacaq “Muğam fəzası” II Beynəlxalq Muğam Festivalına həsr edilmiş mətbuat konfransı keçirilib. APA-nın məlumatına görə, Bəstəkarlar İttifaqının sədri Firəngiz Əlizadə bildirib ki, ikinci dəfə keçiriləcək festival Azərbaycanın müstəqilliyinin 20-ci ildönümünə həsr edilib.

Festivalın proqramını açıqlayan ittifaq sədri deyib ki, martın 14-də Beynəlxalq Muğam Mərkəzində festivalın təntənəli açılış mərasimi olacaq. Bir həftə ərzində Bakıda müxtəlif silsilə tədbirlər keçiriləcək. Martın 16-da, 17-də və 18-də UNESCO səviyyəsində beynəlxalq elmi simpozium təşkil olunacaq. Müxtəlif ölkələrin ən görkəmli musiqişünaslarının, alimlərinin qatılacağı simpoziumun materialları kitab şəklində Azərbaycan, rus, ingilis və ərəb dillərində hazırlanacaq. Martın 18-də, 19-da və 20-də gənc muğam ifaçılarının müsabiqəsi təşkil ediləcək. Festival çərçivəsində hər gün saat 17:00-da Beynəlxalq Muğam Mərkəzində muğam konserti olacaq. Bununla bərabər, hər gün saat 22:00-da Caz Mərkəzində tanınmış caz ifaçılarının konsertləri keçiriləcək.

Firəngiz Əlizadənin sözlərinə görə, festival çərçivəsində simfonik konsertlər, görüşlər də təşkil ediləcək. Opera və Balet Teatrında isə silsilə tamaşalar nümayiş olunacaq. Beynəlxalq Muğam Festivalı martın 21-də Heydər Əliyev Sarayında qala konsertlə öz işinə yekun vuracaq.

Qeyd edək ki, festival Heydər Əliyev Fondu, Mədəniyyət və Turizm Nazirliyi və Bəstəkarlar İttifaqının təşkilatçılığı ilə keçiriləcək.