Mədəniyyət siyasəti

Ana səhifə

Mədəniyyət siyasəti

“Eurovision-2012” mahnı müsabiqəsi ərəfəsində keçirilən “Mənim Azərbaycanım” foto-müsabiqəsinin qaliblərinin mükafatlandırılma mərasimi keçirilib

28 mart 2012 16:51 (UTC +04:00)

APA-nın məlumatına görə, “facebook” sosial şəbəkəsində GoMap.az milli onlayn naviqatoru tərəfindən keçirilən müsabiqə Mədəniyyət və Turizm Nazirliyi tərəfindən dəstəklənib.

Mükafatlandırılma mərasimində çıxış edən mədəniyyət və turizm naziri Əbülfəs Qarayev bildirib ki, foto-müsabiqənin keçirilməsində məqsəd Azərbaycanın ev sahibliyi etdiyi “Eurovision-2012” mahnı müsabiqəsi ərəfəsində Azərbaycanı beynəlxalq aləmdə tanıtmaqdır. Nazir bu yarışmanın Azərbaycanda keçirilməsinin üstünlüklərindən, turizmə töhfəsindən danışıb. Müsabiqədə I yeri 9019 səslə “Şəki şəhəri, Baş Küngüt kəndi” fotosunun müəllifi Nahid Əliyev, II yeri 5005 səslə “Şəmkir rayonundan indiki Muxtariyyə kəndindən Keçili kəndinə gedən yol. Arxeoloji qazıntılar” fotosunun müəllifi Sübhan Cəbrayıllı, III yeri 3629 səslə “Yardımlı rayonu” şəklinin müəllifi Kamil Mirəyev tutub.

Təşkilat Komitəsi “Müsabiqənin ən aktiv iştirakçısı” və “Təşkilatçı rəğbətini qazanmış foto” nominasiyaları üzrə də qalibləri müəyyən edib. Müsabiqədə 87 iştirakçı tərəfindən təqdim olunmuş 255 ədəd fotoşəkil iştirak edib. Bu fotoşəkillərə 34 672 rəy yazılıb və şəkillər ətrafında maraqlı müzakirələr aparılıb, 532 611 nəfər şəbəkə istifadəçisi fotomüsabiqənin səhifəsini ziyarət edib.