Mədəniyyət siyasəti

Ana səhifə

Mədəniyyət siyasəti

“Eurovision-2012” müsabiqəsində 21 dildə mahnı ifa olunacaq

29 mart 2012 08:04 (UTC +04:00)

Bakı. Ülkər Rəşidqızı-APA. Azərbaycanın ev sahibliyi etdiyi «Eurovision -2012» mahnı müsabiqəsində 21 dildə mahnı səslənəcək. APA-nın məlumatına görə, Azərbaycanın ev sahibi olduğu 57-ci müsabiqədə 42 ölkədən 21-i mahnısını ingilis dilində deyil, öz və qonşu ölkələrin dillərində təqdim edəcək. Hər bir ölkə mahnısını öz dilində ifa etmək istəyini “Eurovision” səhnəsində daha çox emosiya ötürə bilmək istəyi ilə əsaslandırır.

“Baku Crystal Hall”da və televiziya qarşısında müsabiqəni izləyəcək yüz milyonlarla tamaşaçı fransız, alban, ispan, yəhudi, udmurt, serb, alman, bolqar, xorvat, boşnak, sloven, island və digər dillərdə mahnıları dinləmək imkanı qazanacaqlar.
Bu il Fransa təmsilçisi Anqun «Echo (You and I)» mahnısını fransız və ingilis, Finlandiya təmsilçisi Pernilla Karlsson "När Jag Blundar"ı isveç, Monteneqro təmsilçisi Rambo Amadeus «Euro Neuro» kompozisiyasını doğma dildə və ingilis dilində, Rumıniyadan olan «Mandinga» qrupunun üzvləri «Zaleilah»ı ispan və ingilis, Albaniya nümayəndəsi Rona Nishliu «Suus» mahnısını alban, Avstriyanı təmsil edən «Trackshittaz» qrupu «Woki Mit Deim Popo»nu alman, İspaniya təmsilçisi Pastora Soler «Quedate Conmigo» mahnısını ispan dilində ifa edəcək.
Eyni zamanda Bakı səhnəsində İtaliya təmsilçisi Nina Zilli italyan, Rusiyanın «Buranovskiye babuşki» qrupu udmurt və ingilis, İsrailin «İzabo» qrupu yəhudi və ingilis, Serbiya təmsilçisi Zeljko Yoksimoviç serb, Portuqaliya təmsilçisi Filipa Sousa portuqal, Makedoniya təmsilçisi Kaliopi makedon-ingilis, Bolqarıstan təmsilçisi Sofi Marinova bolqar, Xorvatiya təmsilçisi Nina Badric xorvat, Bosniya və Hersoqovina təmsilçisi Maya Sar boşnak, Sloveniya təmsilçisi Eva Boto sloven, İslandiyanın Greta Salome & Jonsi dueti isə island dilində mahnı oxuyacaq.
Türkiyə təmsilçisi Can Bonomonun «Love Me Back» mahnısında türk və Gürcüstan adından çıxış edəcək Anri Jokhadzenin «İ’m a Joker» kompozisiyasında gürcü dilində bir neçə kəlmə eşitmək mümkün olacaq.
Azərbaycan, Böyük Britaniya, Latviya, İsveçrə, Yunanıstan, Moldova, Kipr, Danimarka, İrlandiya, Macarıstan, Niderland, Belarus, Malta, Ukrayna, İsveç, Slovakiya, Almaniya, Belçika, San-Marino, Litva, Norveç təmsilçiləri isə mahnılarını ingilis dilində ifa edəcək.

Mayın 26-da «Baku Crystal Hall» səhnəsində Azərbaycanı təmsil edəcək Səbinə Babayeva “When The Music Dies” balladasını ifa edəcək. Bu kompozisiyaya Alim Qasımovun ifasında muğam vurğuları da daxil edilib.

Eurovision