Mədəniyyət siyasəti

Ana səhifə

Mədəniyyət siyasəti

Azərbaycanın “Eurovision-2012” təmsilçisi London, Amsterdam və Budapeştə gedəcək

29 mart 2012 20:12 (UTC +04:00)

Bakı. Ülkər Rəşidqızı – APA. Azərbaycanın “Eurovision-2012” təmsilçisi Səbinə Babayeva Böyük Britaniya, Niderland və Macarıstana səfər edəcək. APA-nın müsabiqənin rəsmi internet saytına istinadən yaydığı xəbərə görə, təmsilçimiz qeyd olunan ölkələrin London, Amsterdam və Budapeşt şəhərlərində çıxışlar edəcək. Səbinə Babayeva onu da deyib ki, “Baku Crystal Hall” səhnəsində ifa edəcəyi "When The Music Dies" mahnısının Azərbaycan versiyası hazırlanır. Təmsilçimizin çıxışından o da məlum olub ki, Azərbaycanın Ukraynada elə həmin ölkənin rejissoru tərəfindən ərsəyə gətirilən klipin çəkilişləri 24 saat davam edib: “Azərbaycanı müsabiqədə yüksək səviyyədə təmsil etmək üçün əlimdən gələni edirəm və bundan yorulmuram. Hazırlıq mərhələsi başlanandan günümə səhər saat 8-dən başlayıram. Dayanmadan hazırlaşırıq və çox işlər görülür. Xüsusi olaraq vokal, ingilis dili və digər sahələrdə müəllimlər yanına gedirəm. Eyni zamanda müsabiqəyə psixoloji tərəfdən də hazır olmam üçün psixoloq belə ayrılıb”.
Səbinə Babayeva mayın 26-da 13 nömrə altında çıxış edəcəyindən sevincini dilə gətirib və bu rəqəmin onun üçün çox uğurlu olduğunu deyib: “Püşkatma zamanı 13 rəqəmi altında çıxış edəcəyim məlum olduqda çox sevindim. Çünki bu mənim ən düşərli və sevimli rəqəmlərimdəndir. Maraqlısı ondadır ki, “Slavyan ulduzu” yarışmasında Qran-pri mükafatını qazananda da məhz 13 nömrə altında çıxış etmişdim. Bu hal bir neçə dəfə olub və mənim üçün sevincli bir haldır”. “Eurovision-2012”də təmsil olunacaq digər ölkələrin ifaçılarından da danışan Səbinə Babayeva, bu il çox güclü səslərlə yarışacağını deyib: “Mənim bəxtimdəndir, ya necə bilmirəm, amma bu il həqiqətən də güclü səslərin sayı çoxdur. Amma mən rəqabət və ya rəqiblər haqda düşünmək istəmirəm, çünki bütün gücümü məhz şoumuzun hazırlığına sərf edirəm. Başqa heç bir fikrin hazırlığımıza maneçilik törətməsini istəmirəm. Bir məqamı da qeyd etmək istərdim, güclü səslərin çoxluğu gözəl haldır və bu məni də sevindirir”.