Mədəniyyət siyasəti

Ana səhifə

Mədəniyyət siyasəti

Nigar Camalın yeni duet ortağı danimarkalıdır

30 mart 2012 16:44 (UTC +04:00)

Bakı. Ülkər Rəşidqızı - APA. “Eurovision-2011» mahnı müsabiqəsinin qalibi Nigar Camal yeni duetin səsyazması üzərində işləyir.

APA-nın eurovision.az saytına istinadən yaydığı xəbərə görə, Nigar Camal Danimarkanın builki milli finalında yarışan 17 yaşlı Karen Viuffla birlikdə səsyazma studiyasında olub.

“Eurovision” qalibi Danimarkanın milli finalında münsiflər heyətinin üzvü kimi Karenin «Universe» mahnısını çox bəyənib və bu mahnının ilk ifaçısı ilə duet oxumaq fikrinə düşüb. Bu məqsədlə o, prodüseri İsa Məlikovla birlikdə mahnının bəstəkarına müraciət edib.

Qeyd edək ki, «Universe» mahnısının bəstəkarı Nigar Camalın yeni albomundakı 7 kompozisiyanın müəllifi Bo Larsendir. Albomun may ayında Azərbaycanın ev sahibliyi edəcəyi 57-ci «Eurovision» mahnı müsabiqəsi ərəfəsində təqdim ediləcəyi gözlənilir.

Karen Viuff milli finalda ölkə təmsilçisi adını qazana bilməsə də, bu dueti gələcək karyerası üçün əhəmiyyətli hesab edir: “Mən Azərbaycanlı müğənni Nikkiyə böyük rəğbət bəsləyirəm. O, karyerası uğrunda əsl mübarizə aparır. Nikkinin böyük ürəyi var və istedadlıdır. İnanıram ki, o, mənə gələcəkdə çox dəstək olacaq”. Qısa vaxt ərzində Nigarla yaxın dost olduqlarını qeyd edən Karen Viuff işgüzar münasibətlərinin yaxşı getdiyini söyləyib.