Mədəniyyət siyasəti

Ana səhifə

Mədəniyyət siyasəti

“Girov” filmi Fransada keçirilən film festivalında nümayiş etdirilib

04 aprel 2012 15:32 (UTC +04:00)

Gecənin təşkilatçıları Avropa Azərbaycan Cəmiyyəti (AAC) və "Confrontations Europe" vətəndaş hərəkatı olub. AAC-dan APA-ya verilən məlumata görə, filmin nümayişinə 70-ə yaxın kinosevər qatılıb. Filmin nümayişindən sonra baş rolun ifaçısı Qurban İsmayılovun iştirakı ilə müzakirə keçirilib. Tədbir iştirakçıları azərbaycanlı müğənni Təranənin ifasını dinləyəndən sonra “Le Risalé” restoranında Azərbaycan yeməklərinin dadına baxıblar.

Tədbiri giriş sözü ilə açan"Confrontations Europe" vətəndaş hərəkatının prezidenti Klod Fişer (Claude Fischer) Azərbaycanın bu il festivalda ilk dəfə təmsil olunmasından məmnunluğunu bildirib. Sonra o, sözü AAC-ın Fransa ofisinin rəhbəri Eliza Pieterə verib. Eliza Pieter bu təşəbbüsə görə "Confrontations Europe" vətəndaş hərəkatına təşəkkür edərək deyib ki, bu cür tədbirlər AAC-ın Azərbaycan və fransız xalqları arasında mədəniyyət sahəsində mübadiləni təbliğ etməsinə imkan yaradır. “L’Europe autour de l’Europe” festivalının direktoru İrena Bilic filmi təqdim edib və bu münasibətlə Bakıdan Parisə gələn Qurban İsmayılova təşəkkürünü bildirib. O qeyd edib ki, festivalın məqsədi müxtəlif az nümayiş olunan filmləri Avropa tamaşaçısına təqdim etməkdir.

Sonra Qurban İsmayılov və iştirakçılar Azərbaycanda kino sənayesinin inkişafını müzakirə ediblər. Tədbir iştirakçıları Q. İsmayılovdan erməni rolunu oynadıqdan sonra Azərbaycan tamaşaçısının ona münasibəti ilə maraqlanıblar. Q. İsmayılov qeyd edib ki, film sülhə səsləyir, düşmən olmamışdan əvvəl kişilərin qardaş, ər və ata olduğunu tamaşaçılara xatırladır. Tamaşaçılardan biri filmin 1980-ci illərdən bəhs etdiyi halda niyə 2006-cı ildə çəkildiyini soruşub. Aktyor deyib ki, müharibə insanların şüurunda təzə olan zaman bu barədə danışmaq çətin olur.

2006-cı ildə Eldar Quliyevin çəkdiyi “Girov” filmində hadisələr 1980-ci illərin sonu, 90-cı illərin əvvəllərində cərəyan edir. Dağlıq Qarabağın erməni icması keçmiş sovet respublikalarından biri olan Azərbaycandan ayrılmağa cəhd edir. Bir gecənin içində bu keçmiş qonşular düşmənə çevrilir, qəflətən sadə kənd əhli hakimiyyət uğrunda mürəkkəb oyunda girova çevrilir. Kənd sakini olan Kərim ermənilər tərəfindən girov götürülür. Kənd şurası onu dəyişdirmək üçün bir ermənini girov götürməyi qərara alır. Yaralı ermənini Kərimin evinin yanındakı tövlədə saxlayırlar. Kərimin həyat yoldaşı və üç uşağı onun qayıtmasını gözləyirlər. Erməni girov da eyni vəziyyətdədir – onun da üç uşağı var, o heç vaxt heç kimə pislik etməyib, o da Kərim kimi yalnız evinə qayıtmaq istəyir. Lakin indi Dağlıq Qarabağda həyat həddindən artıq çətinləşib.