Mədəniyyət siyasəti

Ana səhifə

Mədəniyyət siyasəti

“Eurovision” Təşkilat Komitəsinin növbəti toplantısında orta məktəblərdə dərslərin vaxtından əvvəl dayandırılması məsələsi müzakirə olunacaq

16 aprel 2012 15:47 (UTC +04:00)

APA-nın məlumatına görə, bunu bu gün keçirilən mətbuat konfransında “Eurovision-2012” İşçi Qrupunun rəhbəri Adil Kərimli verib. Onun sözlərinə görə, mayın 22-si və 24-də keçiriləcək yarımfinal mərhələlərindəki şoular final şousu kimi maraqlı olacaq. A. Kərimli Azərbaycanın bu ildə “Eurovision” mahnı müsabiqəsində qalib gələcəyinə inandığını da bildirib.
İşçi Qrupunun rəhbəri bildirib ki, Azərbaycan ev sahibliyi edəcəyi 57-ci “Eurovision” mahnı müsabiqəsinə bu il də ciddi hazırlaşıb: “Baxmayaraq ki, ev sahibliyi ilə bağlı işlər çoxdur. Amma bu, bizim mübarizə əzmimizi azaltmır, əksinə, daha da artırır. Azərbaycan bu il də “Eurovision”da qalib olmağa iddialıdır. Ölkəmizin bu ilki müsabiqədə yenə də yüksək nəticələr əldə edəcəyinə əminik. Hər kəsdə Səbinə Babayevanın iştirakı ilə bağlı yüksək fikirlərin olması bunu sübut edir”.

Konfransda çıxış edən Heydər Əliyev Fondunun icraçı direktoru Anar Ələkbərov “Eurovision 2012” yarışması öncəsi orta məktəblərdə dərslərin dayandırılması barədə qərarın olmadığını bildirib. Fond rəsmisi qeyd edib ki, əvvəllər belə bir təklif səslənsə də, bununla bağlı qərar qəbul olunmayıb. Onun sözlərinə görə, Təşkilat Komitəsinin növbəti toplantısında bu məsələyə toxunulması nəzərdə tutulur.

A. Ələkbərov müsabiqə ərəfəsində paytaxt Bakıda, əsasən də mərkəzi küçələrdə minik avtomobillərin mərkəzə buraxılmaması məsələsinə də aydınlıq gətirib: «Təbiidir ki, xalq çoxsaylı qonaqların şəhərimizə təşrif buyuracağını bilməlidir. Şəhərin mərkəzində tıxacların əmələ gələcəyi məlumdur. Nəqliyyatın normal idarə olunması, nümayəndə heyətlərinin birbaşa canlı şouya zamanında arenaya daxil olması üçün həm Təşkilat Komitəsi, həm müvafiq strukturlar tərəfindən şərait yaradılmalıdır.
Vətəndaşlara mütləq şəkildə müraciətlər olunacaq ki, avtomobillərindən daha az istifadə etsinlər».

A.Ələkbərov onu da deyib ki, minik avtomobillərin şəhərə hansı qaydada daxil olacaqları, ümumiyyətlə, şou ərəfəsində şəhərin mərkəzi küçələrinin bağlanıb-bağlanmayacağı ilə bağlı qərar veriləcək. Bununla bağlı nəqliyyat menecerləri tərəfindən təhlil aparıldıqdan sonra ictimaiyyət məlumatlandırılacaq.

Eurovision