Mədəniyyət siyasəti

Ana səhifə

Mədəniyyət siyasəti

Sietse Bakker: “İki həftə ərzində “Baku Crystal Hall’da işıqlandırma, quraşdırma və abadlaşdırma işləri sona çatmalıdır”

23 aprel 2012 07:17 (UTC +04:00)

Bakı. Ülkər Rəşidqızı – APA. “Eurovision-2012” mahnı müsabiqəsinin keçiriləcəyi “Baku Crystal Hall” və ətrafında abadlıq, quraşdırma, işıqlandırma işləri aparılır. Yaxın iki həftə ərzində bu işlər sona çatmalıdır. APA-nın məlumatına görə, bunu “Eurovision” mahnı müsabiqəsinin təşkilati məsələlər üzrə rəhbəri (“event supervisor”) Sietse Bakker Avropa mətbuatına açıqlamasında deyib. S. Bakker arena yaxınlığında inşa olunan Mətbuat Mərkəzinin artıq hazır olduğunu söyləyib.

Təşkilati işlər üzrə rəhbər biletlərin beynəlxalq satışının ləng getməsi məsələsinə də toxunub: “Biz hazırda maliyyə baxımdan çətin dövrdə yaşayırıq və çoxları üçün - xüsusən Qərbi Avropa dövlətlərinin vətəndaşları üçün Azərbaycana səyahət çox baha başa gələ bilər. Viza alınmasında çətinliklər var idi və biz bunu sadələşdirməyə nail olduq. Buna baxmayaraq, yenə bəzi çətinliklər mövcüddur, amma otellərin bronlaşdırılmasına start verildikdən sonra həqiqətən də biletlərin beynəlxalq satışında artım var. İnanırıq ki, biz hər üç şouda tamamilə dolu zal görəcəyik”.

S. Bakker hər ölkənin “Eurovision” layihəsini həyata keçirəcək gücdə olduğunu vurğulayıb: “Bəziləri zarafat edirdi ki, maliyyə böhranı zamanı Azərbaycan bəlkə də yeganə ölkədir ki, müsabiqəni keçirmək imkanı var. Biz bunu nəzərə aldıq və elə bir sxem yaratdıq ki, hətta kasıb ölkələr də müsabiqəni keçirə bilər”.

S. Bakker Azərbaycanın ev sahibliyi etdiyi bu mötəbər müsabiqənin tamamilə təhlükəsiz, xoş və səmimi atmosferdə baş tutacağına əminliyini ifadə edib. Bütün Avropada terror təhlükəsi yayıldığı bir vaxtda EBU nümayəndəsi hamını sakitləşməyə çağırıb: “Bu günlərdə bəlkə də hər iri tədbirdə terror təhlükəsi ola bilər. Amma təhlükə və real terror aktı arasında böyük fərq var. “Eurovision”da təhlükəsizlik yüksək səviyyədə təmin olunur, biz hüquq-mühafizə orqanları ilə sıx əlaqə qururuq. Bütün sadaladığım amillər bizə deməyə əsas verir ki, müsabiqə həmişəki kimi xoş və səmimi atmosferdə keçiriləcək”.