Mədəniyyət siyasəti

Ana səhifə

Mədəniyyət siyasəti

«Eurovision»un qaliblərinin müsabiqədən sonrakı həyat tarixçəsi

27 aprel 2012 10:50 (UTC +04:00)

Lakin bir çoxlarının ulduz həyatı məhz “Eurovision” səhnəsindən başlayıb.

APA-nın “eurovision.az” saytına istinadən verdiyi məlumata görə, 1956-cı ildə keçirilən “Eurovision” mahnı müsabiqəsinin ilk qalibi Lis Assia (Lys Assia-İsveçrə) səhnə həyatına rəqqasə kimi başlayıb. 1940-cı ildən isə müğənni kimi çıxış edib. 1965-ci ildə ailə həyatı qurduqdan sonra həyat yoldaşının otel biznesində çalışmağa başlayıb. 1995-ci ildə həyat yoldaşının vəfatından sonra yenidən səhnəyə qayıdıb. “Eurovision” Mahnı Müsabiqəsinin ilk qalibi sonrakı illərdə demək olar ki, hər il bu layihəyə fəxri qonaq kimi dəvət olunur. 1958-ci ildə isə İsveçrəli müğənni kraliça II Elizabeta qarşısında çıxış edib.

«Eurovision»un 1957-ci ilinin qalibi Jori Broken (Corry Brokken - Niderland) bu uğurdan sonra müxtəlif filmlərdə çəkilib. 1976-ci ildəki «Eurovision» şousunun aparıcısı olub. Bundan sonra isə o, ümumiyyətlə musiqi karyerasına son verərək hakim olmaq qərarına gəlib. Müsabiqənin 1959-cu il qalibi, niderlandlı müğənni Tedi Şoltenin (Teddy Scholten) karyerası bir müddət yüksələn xətlə davam edib. Lakin o, 1974-cü ildə şou biznes sahəsindən uzaqlaşaraq, Niderland Qırmızı Xaç Cəmiyyətinin ictimai əlaqələr üzrə mütəxəssisi kimi çalışıb. Jan Klod Paskalın (1961-ci ilin qalibi - Lüksemburq) «Eurovision» səhnəsində qazandığı qalibiyyət onun həyatında dönüş yaradıb. Paskal özünü moda sahəsində sınayıb, filmlərdə rol alıb.

İtaliyalı müğənni, müsabiqənin 1964-cü il qalibi Ciqliola Çinkvetti (Gigliola Cinquetti - İtaliya) qələbədən sonra yeni bir hitlə bu yarışmaya qayıdıb və bu dəfə 2-ci yerə sahib olub. Lakin Ciqliola sonradan peşə istiqamətini dəyişib. O, indiyədək peşəkar jurnalist kimi fəaliyyət göstərir. İrlandiyalı təmsilçi Dana (İrlandiya) 1970-ci ildə qələbə qazanaraq "All Kinds of Everything" mahnısı ilə bütün Avropa tamaşaçılarının qəlbini fəth edib. O, bir müddətdən sonra musiqi fəaliyyətinə ara verərək, İrlandiyada prezident seçkilərində iştirak edir və 3-cü yeri tutub. 1999-cu ildə isə Dana Avropa parlamentinə seçilib. Lakin bir müddət sonra siyasi fəaliyyətini donduraraq yenidən musiqiyə qayıdıb. 1972-ci ildə Viki Lindrosun (Vicky Leandros - Lüksemburq) əsl ulduz həyatı başlayıb. Həmin il müsabiqədəki qələbəsindən sonra Avropa, Kanada, Amerika və Yaponiyada möhtəşəm karyera qurub. 90-cı illərin sonunda "Titanik" filminin məşhur "My Heart Will Go On" mahnısının alman versiyasını yazdırıb. Viki Yunanıstanda Pirey şəhərinin məsləhətçisi, daha sonra isə şəhər merinin müavini vəzifəsinə seçilib. O, 2008-ci ilədək bu vəzifədə olub. Sonra yenidən musiqi aləminə dönüb və Avropaya səyahət edib.

1974-cü ildə “Eurovision” səhnəsinə çıxarkən ABBA (İsveç) artıq kifayət qədər populyar idi. "Waterloo" mahnısı ilə qalibiyyəti əldə edən qrupun bundan sonra uğurunun ardı-arası kəsilməyib. Onların oxuduğu hər mahnı hitə çevrilib. Qrup üzvlərindən Benny & Björn yazıçı kimi fəaliyyətlərini davam etdirib. ABBA dağılsa da, onun şöhrəti hələ də dillərdə gəzir. «Eurovision» mahnı müsabiqəsi kanadalı müğənni Selin Diona (Celine Diona – İsveçrə) fenomenal uğur gətirib. 1988-ci ildə "Ne Partez Pas Sans Moi" mahnısı ilə qələbə qazanan Selin Dion bundan sonra hər mahnısı ilə bütün dünyada hitlər şahzadəsinə çevrilib. O, bütün dövrlərin ən çox musiqi albomu satılan müğənni kimi məşhurdur. «Eurovision» yarışması ukraynalı müğənni Ruslananın (Ukrayna) həyatını tamamilə dəyişib. Bütün Avropa çartlarını zəbt edən müğənni bundan sonra siyasətə atılıb və 2006-2007-ci illərdə Ukrayna parlamentinin üzvü olub. Qələbə münasibətilə şəxsən Ukrayna prezidentindən mükafat alan Ruslana UNİCEF-in xoşməramlı səfiri təyin edilib. 2011-ci ilin qalib dueti olan Eldar və Nigar (Azərbaycan) Eurovision səhnəsindən Vətənə əsl ulduz kimi dönüb. Eldar Qasımov hazırda Bakı Slavyan Universitetinin beynəlxalq əlaqələr ixtisası üzrə magistr pilləsində təhsilini davam etdirir. O, rejissor Yuli Qusmanın lentə aldığı "Qorxma, mən səninləyəm" filminin ikinci hissəsində baş rollardan birinə çəkilib. Nigar Camal da karyerasını uğurla davam etdirir, o, hazırda yeni musiqi albomu üzərində işləyir. Eldar özünü bu il «Eurovision-2012»nin aparıcısı kimi də sınayacaq.

Eurovision