Mədəniyyət siyasəti

Ana səhifə

Mədəniyyət siyasəti

«Eurovision 2012» mahnı müsabiqəsinin I yarımfinalında 18 ölkə təmsilçisi öz perfomansını nümayiş etdirib

22 may 2012 22:21 (UTC +04:00)

Bakı. Ülkər Rəşidqızı – APA. «Baku Crystal Hall»nda Azərbaycanın «Eurovision 2012» mahnı müsabiqəsinin I yarımfinal şousunda təmsil olunan 18 ölkə iştirakçısının çıxışı başa çatıb. APA-nın məlumatına görə, şouda Avropa xalqı ilk əvvəl əsrarəngiz və işıqlı Bakı gecələrinin şahidi olub. I yarımfinal mərhələsində dünyanın müxtəlif ölkələrindən minlərlə tamaşaçı şounu canlı izləyib və şou anşlaqla baş tutub. Şounun aparıcıları Leyla, Nərgiz və Eldar Avropanı Azərbaycan, ingilis və fransız dillərində salamlayıblar. Monteneqro təmsilçisi Rambo Amadeus «Euro Neuro» mahnısıyla «Crystal Hall»nda öz perfomansını nümayiş etdirib. Mahnısının mövzusuna uyğun hazırlanan şouda Rambo maraqlı perfomans nümayiş etdirib. İslandiya təmsil edən Gréta Salóme & Jónsi dueti "Mundu Eftir Mér" mahnısını da təqdim ediblər. Hər ikisinin səhnə geyimində qara rəngdən istifadə olunub. Greta şou zamanı öz skripka ifası ilə maraq cəlb edib. Yunanıstan təmsilçisi Eleftheria Eleftheriou "Aphrodisiac" beş rəqqasla səhnəyə çıxıb. Ritmik mahnısına uyğun olaraq kifayət qədər gözəl rəqs nümayiş etdirən ölkə təmsilçisi, rəngli və qısa geyimi, eləcə də maraqlı ifası ilə yadda qalıb. Latviya təmsilçisi Anmary "Beautiful Song" mahnısı zamanı göy rəngli geyimdə səhnəyə çıxıb. Onu müxtəlif rəng geyimlərlə dörd bek-vokal müşayiət edib. Albaniya təmsilçisi Rona Nishliu lirik və dramatik "Suus" mahnısını özünəməxsus şəkildə təqdim edib. Çox maraqlı səhnə geyimi və saç düzümü ilə seçilən sənətçi, səhnədə işıqlar altında perfomansı zamanı tək olub. Rumıniya təmsilçiləri «Mandinga» qrupunun çıxışından əvvəl mayın 19-da keçirilən Eurovision 2012 mahnı müsabiqəsinin açılış mərasimində qonaqların qarşılanmasında ibarət xüsusi video nümayiş etdirilib. Daha sonra qrup "Zaleilah" mahnısı ilə bütün zalda olan mətbuat nümayəndələrini coşdurub. Rumıniyanın təmsilçi qrupunun bütün musiqiçiləri ağ rəngdə, İsveçrənin «Sinplus» qrupunun üzvləri Qabriel və İvan «Unbreakable» mahnısının ritminə uyğun bir geyimdə səhnəyə çıxıblar. Builki yarışmanın ən gənc ifaçılarından olan Belçika təmsilçisi İris, "Would You?" mahnısının ifası zamanı ag rəngli geyimdə maraqlı görünüb. O, sakit ifası ilə seçilib. Finlandiyanı Bakıdakı şouda təmsil edən Pernilla Karlsson anasına həsr etdiyi və qardaşı ilə birgə hazırladığı «När Jag Blundar» mahnısını ifa edərkən, bir musiqiçi onu səhnədə müşayiət edib.
İsrailin «İzabo» qrupu "Time" mahnısı zamanı «Baku Crystal Hall»nda qurulmuş LED ekranlarda mahnıya uyğun olaraq saatlar nümayiş etdirilib. Beş nəfərdən ibarət qrup saatların dövrəsində çıxış edib və şounun sonunda qrupun iki üzvünün səhnədəcə öpüşməsi maraqla qarşılanan məqamlardan olub.
San Marino təmsilçisi Valentina Monettanın «The Social Network Song (Oh Oh – Uh - Oh Oh)» mahnısı üçün hazırlanan şousunda səhnəyə üzəri «Swarovski” qaşlarla bəzədilmiş və ölkəsinin bayrağı əks olunmuş noutbuk qoyulub. Ölkə təmsilçisinin ifası zamanı onu polis və həkim geyimlərində rəqqaslar müşayiət ediblər. Kipr təmsilçisi İvi Adamou "La La Love" mahnısının səhnə plastikası ilə seçilib. Dörd rəqqasla müşayiət olunan İvi maraqlı şou nümayiş etdirib.
Danimarka təmsilçisi Soluna Samay "Should’ve Known Better" mahnısını ifa edərkən uzun illər olduğu kimi yenə də gitara ifa edib. Rusiyanı təmsil edən "Bronovskiye babuşki"nin «Party for everybody» mahnısının ifası isə hər zamankı kimi yenə də maraqla qarşılanıb. Nənələr «Baku Crystal Hall»nın səhnəsində sobada öz ənənələrinə sadiq qalaraq kökələr də bişiriblər. Sobalarından tüstü çıxan nənələr, milli geyimlərlə səhnəyə çıxıblar. Macarıstanın "Compact Disco" qrupu "Sound Of Our Hearts" mahnısını maraqlı tərzdə təqdim ediblər. Avstriya təmsilçisi "Trackshittaz" qrupu "Woki Mit Deim Popo" mahnısının şousu üç rəqqas qızın ifasında diqqət cəlb edib. Qrupun hər iki üzvü səhnədə maraqlı rəqsləri ilə diqqət çəkiblər. Moldova təmsilçisi Pasha Parfeny "Lăutar" mahnısını ifa edərkən ifaçını maraqlı geyimlərdə beş rəqqasə müşayiət edib. Bu müddət ərzində ən maraqlı anlarla yaddaşlara həkk olunan "Jedward" qrupu "Waterline" mahnısının şousu zamanı «Baku Crystal Hall»nda suyun altında çıxış ediblər. Bakı səhnəsində fantan yaradan əkiz qardaşlar, həm səhnə geyimləri, həm də rəqsləri ilə seçilməyi bacarıblar.

«Baku Crystal Hall»da hər ifadan əvvəl həmin ölkənin bayrağının əks olunması isə Eurovision tarixində ilk olub. İstər «Baku Crystal Hall», istərsə də şəhərin ən yüksək nöqtəsində yerləşən «Flame Tower» ölkəmizin bütün qonaqları bu bayraqları əks etdirərək salamlayıb. Hər ölkənin çıxışından əvvəl nümayiş olunan video-çarxlarda isə Azərbaycanın dilbər guşələri, qarlı dağları, mədəniyyəti, musiqisi, qədim adət-ənənələri, milli mətbəximiz, çay dəsgahı, gülərüz və qonaqpərvər insanları minlərlə insana təqdim olunub. Hər ölkə təmsilçisinin çıxışı zamanı mahnıya uyğun olaraq Bakı səhnəsində 3D effektlərindən istifadə olunub.

Hazırda yarımfinalda çıxış edən 18 təmsilçinin səsverməsi başlayır. Bir neçə dəqiqədən sonra finala keçən 10 ölkə məlum olacaq.