Mədəniyyət siyasəti

Ana səhifə

Mədəniyyət siyasəti

“Eurovision-2012” mahnı müsabiqəsinin finalı ərəfəsində dünyanın bir sıra aparıcı KİV-i Azərbaycan haqqında nə yazır? - İCMAL

“Eurovision-2012” mahnı müsabiqəsinin finalı ərəfəsində dünyanın bir sıra aparıcı KİV-i Azərbaycan haqqında nə yazır? - <font color=red>İCMAL</font>

25 may 2012 15:12 (UTC +04:00)

Bakı – APA. “Eurovision-2012” mahnı müsabiqəsinin finalı ərəfəsində dünyanın bir sıra aparıcı kütləvi informasiya vasitələrində Azərbaycan haqqında yazılar dərc olunur.

APA-nın xəbərinə görə, Britaniyanın “Economist” jurnalında “Musiqinin səsləri” başlıqlı yazıda qeyd edilir ki, dünya mediası “Eurovision”a hazırlıq ərəfəsində Azərbaycanda insan haqlarının durumuna ciddi diqqət yetirir. Lakin Avropa Yayım Birliyinin nümayəndələri şəxsi söhbətlərdə tez-tez sual verirlər ki, insan haqları pozuntularının mövcud olduğu Rusiya və Türkiyə kimi ölkələr müsabiqəyə ev sahibliyi edərkən niyə bu məsələyə indiki kimi diqqət göstərilmirdi?”

Məqalənin müəllifi qeyd edir ki, nikbinlər Azərbaycanda uzunmüddətli dəyişikliklərin toxumlarının atıldığını görə bilər: “Energetika iqtisadiyyatın başlıca sahəsi olaraq alır. 2017-ci ilə qədər “Şahdəniz” yatağının ixrac potensialının iki dəfə artacağı gözlənilir. Lakin bununla yanaşı, neft hasilatı azalır. Hökumət əvvəl-axır iqtisadiyyatın diversifikasiyası haqqında düşünməli olacaq”.

“The Wall Street Journal” qəzeti isə Azərbaycan hökumətinin paytaxta yeni obraz qazandırmaqda əldə etdiyi uğurlara toxunub: “Prestijli layihələrin tez müddətdə həyata keçirilməsi bu boz sovet şəhərini öz vitrinləri və işıqları ilə bərq vuran bir şəhərə çevirib. Hava limanına gedən yol və Xəzər sahilindəki bulvar genişləndirilib. Bulvardan alov formasında 3 binadan ibarət 350 milyon dollarlıq “Flame Towers” kompleksi görünür. Müxalifət fəalları öz narazılıqlarını bildirmək üçün “Eurovision”dan uğurla istifadə etsələr də, azərbaycanlıların çoxu “Eurovision”a bayram və milli qürur mənbəyi kim baxır”.

Maran Terner CNN üçün yazdığı məqalədə sual verir: “Eurovision” nə üçün Azərbaycanda keçirilməməlidir?” Müəllif qeyd edir ki, müsabiqənin siyasiləşməsinə yol verilməyəcəyinə dair vədlərə baxmayaraq, bu faktiki olaraq mümkün deyil: “Mahiyyətcə, bu, sənətçilərin müsabiqəsidir. Lakin bu heç də belə deyil. Bu, Avropa siyasətinin parlaq təzahür formasıdır. Bu şou 1956-cı ildən başlayaraq regional siyasəti əks etdirir”. Müəllif hesab edir ki, bu müsabiqə Azərbaycan xalqına özünü təkcə ən yaxşı tərəfdən tanıtmaq imkanı vermir: “Eurovision” həm də bizim üçün diqqətimizi müsabiqəni keçirən ölkənin hökuməti üzərində cəmləşdirmək və islahatlara başlamağı tələb etmək imkanı verir”.

Fransada nəşr olunan “Le Monde” qəzeti yazır ki, “Eurovision” müsabiqəsi gənc respublika olan Azərbaycana ölkədə ilk dəfə beynəlxalq əhəmiyyətli tədbir keçirmək imkanı verib. Qəzet Azərbaycan iqtisadiyyatının dinamik inkişafda olduğunu qeyd edir və müxtəlif tikililərlə göz qamaşdıran paytaxt Bakını “Qafqazın Dubayı” adlandırır. Fransanın nüfuzlu nəşrlərindən olan “Le Monde”nin müxbiri Qiyom Perrye qeyd edir ki, son səkkiz ildə ölkədə ümumi daxili məhsulun həcmi üç dəfə artıb, eyni zamanda maaşlar da artıb, lakin bununla belə əhalinin qazancı aşağı səviyyədədir. Ölkənin enerji ehtiyatları ilə bağlı rəqəmləri açıqlayan müəllif bu ehtiyatların son dərəcə çox olduğunu bildirir: “Azərbaycan zəngin enerji resurslarına sahibdir, ölkənin gəlirlərinin 90 faizi bu resursların payına düşür. İqtisadi artım göstəriciləri başgicəlləndiricidir – 2005-ci ildə iqtisadi artım 26,4%, 2006-cı ildə 34,6%, 2007-ci ilin əvvəllərində isə 41% təşkil edib”.

Qəzet Dağlıq Qarabağ münaqişəsinə də yer ayırıb: “Qonşu Ermənistan hələ də Azərbaycan ərazilərinin 16 faizini işğal altında saxlayır, söhbət Dağlıq Qarabağdan və ona bitişik rayonlardan gedir”. “Le Monde” ölkədə bir milyona yaxın qaçqının olduğunu da xatırladıb. Qəzet bildirir ki, hazırda Azərbaycanın hərbi büdcəsinin həcmi Ermənistanın dövlət büdcəsinə bərabərdir.

Fransanın digər nüfuzlu nəşri “Le Figaro” hesab edir ki, Moskva üçün “Olimpiada-80” nə deməkdirsə, Azərbaycan üçün “Eurovision” müsabiqəsi bunun ekvivalentidir. Qəzet yazır ki, Bakıda bayram əhval-ruhiyyəsi hökm sürür, bununla belə məmurlar artıq müxalifətin, Qərb hüquq müdafiəçilərinin və Azərbaycana düşmənçilik münasibəti bəsləyən qonşu ölkələrin indiyədək presedenti olmayan tənqidlərinə cavab verməkdən beziblər: “Prezident İlham Əliyev “İkinci Dubay” adlandırılan Bakı üçün heç nəyi əsirgəmir”.

Qəzet həmçinin ölkədə turizm infrastrukturunun inkişafından da söz açıb. O, qeyri-hökumət təşkilatlarının məlumatlarına əsaslanaraq, insanların evlərindən köçürülmə zamanı mülkiyyət hüquqları ilə bağlı mübahisələr yarandığını da qeyd edib.

Müxbir Pyer Avril həmçinin “Eurovision” müsabiqəsinin keçirilməsi ilə əlaqədar İranın Azərbaycana qarşı tutduğu sərt mövqeyə də yer verib: “İran öz şimal sərhədlərində dünyəvi dövlətin mövcudluğunu heç cür qəbul edə bilmir”.

“Eurovision”