Mədəniyyət siyasəti

Ana səhifə

Mədəniyyət siyasəti

QHT rəhbərləri “Eurovision” müsabiqəsinin siyasiləşdirilməsinin əleyhinədir

29 may 2012 12:46 (UTC +04:00)

Bakı. Rəşad Süleymanov-APA. “Evrovision” mahnı yarışması nə demokratiya, nə siyasət yarışması, nə də digər məsələ deyil. Bu, sadəcə bir mahnı yarışmasıdır. Ona görə bu yarışmanın siyasiləşdirilməsi, hansısa rənglərin verilməsi, hansısa siyasi haqq-hesab çəkilməsi yol verilməzdir». Bu fikirləri APA-ya açıqlamasında «Müstəqil Hüquq Mərkəzi» İctimai Birliyinin sədri Aydın Kərimov bildirib.

A. Kərimovun fikrincə, bu yarışmanın siyasiləşdirilməsi həm “Evrovision” ideyalarına ziddir, həm də ölkənin daxilində mədəni inkişafa mane olur.

İranın mahnı yarışması ilə əlaqədar səsləndirdiyi bəyanatlara münasibət bildirən mərkəz rəhbərinin sözlərinə görə, İranın bu məsələyə qarışmaq hüququ yoxdur. O, Tehranın etirazlarının yersiz olduğunu deyib.

Bəzi beynəlxalq təşkilatların “Evrovision”la bağlı bəyanatlarına gəlincə, A. Kərimov deyib ki, bu tip bəyanatlar fərqli dövrlərdə də olur və bunun “Evrovision”la əlaqələndirilməsi yolverilməzdir.

«Media və Mülki Cəmiyyət» İctimai Birliyinin sədri Xanoğlan Əhmədov da “Eurovision” kimi nüfuzlu bir beynəlxalq mahnı müsabiqəsinin siyasiləşdirilməsini doğru saymır. Bu tip müsabiqələrin Azərbaycanın beynəlxalq səviyyədə tanıdılması baxımından mühüm tədbir olduğunu deyən təşkilat rəhbərinin sözlərinə görə, bu cür tədbirlərdən istifadə edərək diqqəti Azərbaycanın daha böyük və ümummilli problemlərinə yönəltmək lazım idi.

İranın musiqi yarışması ilə bağlı etirazlarına gəlincə, təşkilat rəhbərinin sözlərinə görə, bunlar əslində bir bəhanədir: «İndiyədək Azərbaycanda müəyyən mahnı müsabiqələri keçirilib. Eləcə də digər müsəlman dövlətlərində fərqli müsabiqələr keçirilib. “Evrovision”la bağlı Azərbaycanda dindarların ləyaqətinə toxunulacaq hər hansı bir hərəkətə yol verilməyib. Bu tədbirdə islami dəyərlərə toxunulacaq hər hansı bir hərəkət qeydə alınmadı”.