Mədəniyyət siyasəti

Ana səhifə

Mədəniyyət siyasəti

Azərbaycanın mədəniyyət ocaqlarında yaş senzi ilə bağlı ixtisarlar olacaq

26 iyul 2012 11:25 (UTC +04:00)

Bakı. Ülkər Rəşidqızı-APA. Azərbaycanın bir sıra mədəniyyət qurumlarında yaş senzi ilə bağlı ixtisarlar olacaq. APA-nın məlumatına görə, bununla bağlı həm Azərbaycan Dövlət Gənc Tamaşaçılar Teatrı, həm də digər müəssisələrdə ixtisarlar nəzərdə tutulur. Gənc Tamaşaçılar Teatrından ixtisara düşənlər arasında teatrın baş rejissoru, xalq artisti Cənnət Səlimovanın da adı var.

Azərbaycan Dövlət Gənc Tamaşaçılar Teatrına yeni baş rejissoru təyin olunacağı gözlənilir. Teatrın direktoru, əməkdar incəsənət xadimi Mübariz Həmidov APA-ya açıqlamasında bildirib ki, tanınmış rejissor, xalq artisti Cənnət Səlimovanın baş rejissor vəzifəsindən gedəcəyi və bu vəzifəyə rejissor Bəhram Osmanov təyin olunacağı nəzərdə tutulur: “Bununla bağlı hələ rəsmi qərar yoxdur. Cənnət xanım da hazırda məzuniyyətdədir, ümumiyyətlə teatr heyəti işdə deyil. Belə bir söhbət var, amma heç bir rəsmi qərar və sənəd hələ yoxdur. Yenilik olsa artıq yeni mövsümdə məlum olacaq”. Qeyd edək ki, Cənnət Səlimova bu vəzifədən getməyə dair hələ heç bir ərizə yazmayıb. M. Həmidov mövcud qərarın Mədəniyyət və Turizm Nazirliyi tərəfindən veriləcəyini deyib.

Məlumat üçün deyək ki, mədəniyyət ocaqlarında yeni ixtisarlarla bağlı tam məlumatın növbəti həftənin ilk günlərində açıqlanması nəzərdə tutulur.