Mədəniyyət siyasəti

Ana səhifə

Mədəniyyət siyasəti

Müsəlmanları təhqir edən filmin arxasındakı 4 şəxs kimdir?-FOTO

Müsəlmanları təhqir edən filmin arxasındakı 4 şəxs kimdir?-<font color=red>FOTO</font>

14 sentyabr 2012 05:53 (UTC +04:00)

Filmin prodüsseri: Sam Bassiel

APA-nın beynəlxalq KİV-ə istinadən verdiyi məlumata görə, filmin prodüsseri kimi göstərilən Sam Bassielin əsl adı Nakoula Basseley Nakouladır. O, filmdəki aktyorlara bu əsərin adını “Səhra döyüşçüləri” kimi təqdim edib. Filmin internetdə yayımlanan təqdimat video rolikində özünü Sam Bassiel kimi təqdim etsə də, “Wall Street Journal” bu şəxsin 52 yaşındakı Nakoula Basseley Nakoula olduğunu dəqiqləşdirib. Bu şəxs İsrail və Amerikanın ikili vətəndaşıdır. Filmin məsləhətçisi Stev Klein onun Kıpti xristian ( qədim dövrdən xristianlığı qəbul edən misirlilər. Onlar İsanın ilahi və insanı tərəflərinin eyni olduğunu iddia etdikləri üçün katolik xristianlar tərəfindən də inkar edilirlər. Bəzi mənbələrə görə, indi Misirin özündə 7 milyona qədər Kıpti yaşayır-red) olduğunu deyib. Nakoulanın əvvəllər saxta sənədlə fırıldaqçılıq etdiyi üçün 790 min dollar təzminat və 21 ay həbs cəzası aldığı da bəlli olub.

Filmin məsləhətçisi: Stev Klein (Steve Klein)

“Cəsur Xristian Birliyi”, “Beynəlxalq Amerika Kıpti Məclisi” kimi ifrat sağçı və islam əleyhdarı olan təşkilatların üzvüdür. ABŞ-ın Kaliforniya ştatındakı Kaveyah qəsəbəsindəki Kıpti kilsəsi ilə yaxın əlaqələri var. Filmin çəkilməsi ilə bağlı danışarkən “bu işə nəticəsinin nə olacağını bilərək, başladıq” deyib.

Filmin reklamçısı: Terri Cones (Terry Jones)

Bu şəxs 2010-ci ildə “Quranı yandırma ayini təşkil edəcəyəm” deməsi ilə qalmaqal yaratmış amerikalı rahibdir. Cones “Müsəlmanların məsumiyyəti” filminə dəstək verdiyini, filmin reklamı ilə məşğul olduğunu acıq söyləyib. Amerika Ordusunun Baş Qərargah rəisinin filmin təbliği ilə məşğul olmağı dayandırması çağırışını da açıq bəyanatla rədd edib.

Ərəbçəyə çevirən: Morris Sadek (Morris Sadek)

Beynəlxalq Amerika Kıpti Məclisinin misirli rəhbəridir. Filmin əsasən müsəlman dünyasında çaxnaşma yaratmasına səbəb məhz onun ərəbcə versiyası olub. O, filmin “Youtube” saytında yayımlanan linklərini özünün Twitter hesabında da paylaşmaqdan çəkinməyib. Hazırda ABŞ-ın Kaliforniya ştatında yaşayır və özünü “hüquq müdafiəçisi” kimi təqdim edir.

İlk versiya-“Bin Ladenin məsumiyyəti”

Amerika mediasında yazılana görə, filmin ilk versiyası ucuz və uğursuz olub, Bu film ilk dəfə Hollivudda bir kino salonunda “Bin Ladenin məsumiyyəti” adı ilə göstərilib. Lakin heç bir müzakirəyə səbəb olmayıb. Bundan sonra prodüsser və dəstəkçiləri filmin adına və reklam çarxlarına Məhəmməd Peyğəmbərlə bağlı hissələri çıxarmaqla, dünyanı çalxalamağa nail olublar.

“Aldadıldıq”

Filmin aktyor və texniki heyətində təmsil olunan 80 nəfər isə aldadıldıqlarını iddia edirlər. Onlar dünən yayımladıqları “Aldadıldıq” başlıqlı açıqlamalarında internetdə “Səhra döyüşçüləri” adlı filmin çəkilişi ilə bağlı élan görəndən sonra filmin prodüsseri Sam Bassiel ilə əlaqə saxladıqlarını qeyd ediblər. Onlar islam əleyhinə bir filimdə deyil, qədim Misiri anladan əsərdə oynadıqlarını deyiblər. Heyətin bildirdiyinə görə, filimdə bəzi obrazların müraciəti belə dəyişdirilib. Məsələn, filmin bir yerində aktyorun qarşısındakını “Georgi” deyə çağırdığı ağız işarəsi ilə anlaşılsa da, səs “Məhəmməd” olaraq çıxır. Filmin heyəti qeyd edib ki, onlar ssenarinin sonradan “qorxunc bir şəkildə dəyişdirildiyini görərkən, şoka düşüblər: “Ortaya çıxan faciədən sarsıldıq”.

Qeyd edək ki, “Müsəlmanların məsumiyyəti” adı ilə yayımlanan film islam aləmində etirazlara və iğtişalara səbəb olub. Olaylar xüsusilə ərəb ölkələrində qanlı qətllərlə yadda qalıb. ABŞ-ın Liviyadakı konsulu və bir neçə diplomatı konsulluq binasına hücum edənlər tərəfindən öldürülüb, binanın altı üstünə çevrilərək, yandırılıb. Misirdə isə bir neçə gündür ki, səngiməyən iğtişaşlarda yüzlərlə insan xəsarət alıb.