Mədəniyyət siyasəti

Ana səhifə

Mədəniyyət siyasəti

18 sentyabr - Milli Musiqi Günü Üzeyir Hacıbəyli adına Bakı Musiqi Akademiyasının qarşısında təntənəli şəkildə qeyd olunub

18 sentyabr 2012 09:47 (UTC +04:00)

Bakı. Ülkər Rəşidqızı – APA. Bu gün Üzeyir Hacıbəyli adına Bakı Musiqi Akademiyasının (BMA) qarşısında Azərbaycanın dahi bəstəkarı Üzeyir Hacıbəylinin doğum günü və 18 sentyabr – Milli Musiqi Günü münasibətilə təntənəli mərasim keçirilib. APA-nın məlumatına görə, mərasimə Müslüm Maqomayevin “Azərbaycan” kompozisiyası ilə start verilib.

Tədbirdə çıxış edən mədəniyyət və turizm naziri Əbülfəs Qarayev Üzeyir Hacıbəylinin doğum gününün 1995-ci ildən etibarən prezident Heydər Əliyevin xüsusi sərəncamı ilə Üzeyir Musiqi Günü kimi qeyd edildiyini xatırladıb. Nazir bu il artıq dördüncü dəfə Mədəniyyət və Turizm Nazirliyinin təşkilatçılığı ilə Üzeyir Hacıbəylinin doğum günü ilə əlaqədar
Beynəlxalq Musiqi Festivalının keçiriləcəyini açıqlayıb.

Bəstəkarlar İttifaqının sədri, xalq artisti Firəngiz Əlizadə Üzeyir bəyin şərəfli həyat və yaradıcılıq yolundan danışıb. Üzeyir Hacıbəylinin musiqisinin yeni bəstəkarlar üçün ilham mənbəyi olduğunu bildirən F. Əlizadə yubileylə əlaqədar görülən işlər barədə məlumat verib.
BMA rektoru, xalq artisti Fərhad Bədəlbəyli Azərbaycanın Üzeyir Hacıbəyli kimi bir dahi şəxsiyyəti olduğuna görə fəxr etdiyini deyib:
“Üzeyir bəy musiqimizin peyğəmbəridir. Onun ruhu indi çox narahatdır, çünki əsərləri Şuşada səslənmir. İnanıram ki, onun musiqiləri tezliklə müqəddəs Şuşada səslənəcək. Var olsun Üzeyir bəy!”.

Tədbirdə Milli Musiqi Konservatoriyasının rektoru, xalq artisti Siyavuş Kərimi Azərbaycanın dünyada musiqi dövləti kimi tanındığını qeyd edib və Üzeyir bəyin əsərlərinin bütün dünyada səsləndiyindən məmnun olduğunu bildirib.

Çıxışlardan sonra məxsusi olaraq bu gün üçün hazırlanan konsert proqramı nümayiş etdirilib. Azərbaycan Dövlət Xalq Çalğı Alətləri Orkestri, Azərbaycan Dövlət Xor Kapellası və Müdafiə Nazirliyinin nümunəvi Hərbi Orkestrinin ifasında dahi bəstəkarın əsərləri ifa olunub. Klassik musiqisevərlər Üzeyir Hacıbəylinin abidəsi önündə açıq havada bu möhtəşəm musiqiləri dinləmək imkanı qazanıblar.