Media

Ana səhifə

Media

Türkdilli Ölkələrin II Media Forumu çərçivəsində “Türkdilli ölkə və toplumlarda sosial media: yeni baxış bucağı birləşdirici faktor kimi” mövzusunda panel keçirilib - FOTOSESSİYA

28 oktyabr 2011 14:44 (UTC +04:00)

APA-nın məlumatına görə, ikinci paneldə “Türkdilli ölkə və toplumlarda sosial media: yeni baxış bucağı birləşdirici faktor kimi” mövzusunda müzakirələr aparılıb. Panelə Qazaxıstanın “Nur Media” Holdinqinin baş direktoru Kaysar Janaxanov sədrlik edib.

Məruzəçi qismində çıxış edən “APA Group”un baş direktoru Vüsalə Mahirqızı sosial medianın vəziyyətinə toxunub. Əvvəlcə internet mediasının durumu barədə danışan V. Mahirqızı deyib ki, internet istifadəçilərinin sayı hazırda Azərbaycan əhalisinin 50 faizini təşkil edir: “Azərbaycanda bu sahədə rəqabət mühiti var. Yaxın aylarda internetin qiymətinin aşağı salınması da gözlənilir. Amma hazırkı statisikaya görə, Azərbaycan interneyin qoymətinin aşağı salınması tempinə görə dünyada lider ölkələrdən biridir. Ölkədə internetdən istifadə azaddır. Sosial şəbəkələrdən istifadəyə də məhdudiyyət yoxdur. Vaxtilə www.odnoklassniki.ru lider olsa da, hazırda www.facebook.com liderlik edir. Azərbaycanın dövlət başçısının da www.facebook.com və www.twitter.com sosial şəbəkələrində mütəmadi yenilənən səhifələri var. 18-25 yaş arasında əhali bu sahədə aktivlik nümayiş etdirir. Demək olar ki, bütün media orqanlarının sosial şəbəkələrdə səhifələri mövcuddur. Ölkədəki əksəriyyət internet-medianın, o cümlədən “APA Group”-a daxil olan portalların da facebook.com-da səhifələri var”.

V. Mahirqızı qeyd edib ki, ölkədə 40-ya yaxın internet provayderi olsa da, xidmət yüksək səviyyədə deyil. Əksər portalların serverləri xaricdədir. O, internet mediası üçün kadr hazırlığı məsələsinə də toxunaraq artıq Azərbaycanın bir neçə universitetlərində online KİV bölmələrinin fəaliyyətə başladığını söyləyib: “Türk dövlətləri üçün informasiya blokadasını yarmağın əsas vasitəsi internetdir. Məsələn, bizim televiziyalara peyk vasitəsilə baxmaq mümkündür. Lakin telekanallara ancaq Azərbaycan dilini bilənlər baxa bilirlər. Agentliklər bu problemi həll edə bilər”.

V. Mahirqızı Azərbaycanda xarici dillərdə yayımlanan xəbər agentliklərinin fəaliyyət göstərdiyini də nəzərə çatdırıb: “Azərbaycan türkdilli media qurumları ilə əməkdaşlıqda çox maraqlıdır. Bizim oxucularımız da bunu istəyir. Təəssüf ki, belə şəbəkənin yaranmasına nail ola bilməmişik. Ancaq Qazaxıstanın “Nur Media” Holdinqi və Kipr Türk Respublikasında bir informasiya agentliyi ilə əlaqələrimiz var. “Trend” və Azərtac agentlikləri də bu sahədə addımlar atıb. Lakin təəssüf ki, köklü nəticə verəcək iş yoxdur. Bu platforma əsasında ortaq xəbər agentliyinin yaradılması əsasdır. Belə qurum ingilis, rus və fransız dillərində fəaliyyət göstərsə, yaxşı olar. Agentlik etnik səciyyə daşımamalı, transmilli səviyyədə formalaşmalıdır. Çünki rəsmi qurumların xarici dillərdə saytları olsa da, diqqət cəlb etmir. Fikrimcə, sosial şəbəkələrdə türk toplumlarının jurnalistlərinin qurumunu yaratmaqla xəbər mübadiləsi etmək olar. Məsələn, Avropada ekologiyadan yazan jurnalistlərin, ya da neft-qazdan yazan jurnalistlərin şəbəkəsi mövcuddur. Belə sosial şəbəkələr bizə əlaqələrimizi genişləndirməyə imkan verər”.

Sonra sualları cavablandıran V. Mahirqızı qeyd edib ki, Azərbaycan Dövlət Neft Akademiyasında baş verən məlum hadisə zamanı internet şəbəkəsində problemlər yaranıb: “İnternetdən aktiv və passiv istifadəçilər var. Onların bəziləri yalnız hadisə baş verəndə internetə daxil olur. Hazırkı texniki imkanlarımız 4 milyon adamın eyni anda internetə girməsinə imkan vermir. Yəni tıxac yaranır”.

V. Mahirqızı ortaq xəbər qurumunun yaradılması ideyasının reallaşacağına və bu məsələnin tədbirin yekun bəyannaməsində yer alacağına inandığını vurğulayıb. Güney Azərbaycan təmsilçilərinin foruma dəvət olunub-olunmaması ilə bağlı suala cavabında V. Mahirqızı deyib: “Təəssüf ki, İranda türk dilində yayımlanan media qurumlarından heç biri tədbirə dəvət edilməyib. Məsələn, Güney Azərbaycan ərazisində Urmiya gölü var. Bu gölün quruması prosesi gedir. Azərbaycanlılar bir neçə həftə əvvəl aksiyalar keçirirdi. Bu aksiyalar amansızlıqla yatırıldı və 2 nəfər öldü, onlarla adam yaralandı, 100-ə yaxın adam tutuldu. Xarici media hadisə barədə reportajlar verdi. Təəssüf ki, türkdilli dövlətlərin media qurumları bununla bağlı bir xəbər belə vermədi. Əgər türkdilli media Tripolidən canlı yayın verə bilirdisə, Bəşər Əsədin dağıtdığı mitinqləri işıqlandıra bilirsə, Əhmədnejatın dağıtdığı aksiyalardan da nəsə yazmaq olar. Nəzərə alsaq ki, təzyiqlərə məruz qalanlar türklərdir, bu diqqət ikiqat olmalıdır”.

Qazaxıstanın “Nur Media” holdinqinin baş direktoru Kaysar Janaxanov isə xatırladıb ki, 10 milyon qazax SSRİ dövründə repressiya və soyqırıma məruz qalıb, 7 milyona yaxın insan sürgün olunub, 3 milyonu Çinə qaçıb. Bu səbəblə qazaxlar bu məsələni anlayır və dəstək verməyə hazırdır. O qeyd edib ki, ABŞ domenlərin böyük əksəriyyətinə nəzarət edir: “İstənilən vaxt ABŞ interneti bağlaya bilər. Türkdilli ölkələr vahid milli domenin formalaşdırmasına cəhd etməlidir”.

Tədbirdə uydurma “erməni soyqırımı” əleyhinə ortaq şəbəkənin yaradılması təklifi də irəli sürülüb.

Panel əlavə təklif və müzakirələrlə davam etdirilib.

Türk_Media_Forum