Sahibkarlıq

Ana səhifə

Sahibkarlıq

«Iteca Caspian»ın Azərbaycanda yeni sərgi mövsümü martda başlayacaq

09 fevral 2009 09:57 (UTC +04:00)

Bakı. Nicat Mustafayev – APA-Economics. Böyük Britaniyanın «ITE Group» şirkətinin Qafqazdakı eksklyuziv tərəfdaşı olan «Iteca Caspian» şirkətinin Azərbaycanda 2009-cu il üçün sərgi mövsümü mart ayında başlayacaq. «Iteca Caspian» şirkətindən «APA-Economics»ə verilən məlumata görə, bu il 21 layihənin həyata keçirilməsi planlaşdırılır.
Sərgi mövsümü ənənəvi olaraq iki yarımilliyə bölünüb, iyul və avqust aylarında isə fasilə olacaq. Yaz mövsümündə 9 sərgi layihəsi keçiriləcək.
Mövsümü Azərbaycan Beynəlxalq Avtomobil Sərgisi (AutoShow) açacaq. Artıq Avropa və Asiya ölkələrinin 50-dən çox aparıcı brendi sərgidə iştirak etmək niyyətindədir. Rusiya, Almaniya, Türkiyə, İran, Çin, Belarus, Yaponiya və digər ölkələrin şirkətləri layihədə iştirakını artıq təsdiqləyib. Xüsusi nəqliyyat bölməsində Azərbaycanda analoqu olmayan, müxtəlif ölçülü gəzinti və yarış yaxtalarının təqdimatı da keçiriləcək. Bundan başqa, sərgidə sərnişin avtobusları, dartıcılar, özüboşaldanlar və müxtəlif növ məhsulların nəql etdirilməsi üçün yarım-qoşma vaqonlar da nümayiş olunacaq.
«AutoShow» ilə bərabər III Azərbaycan Beynəlxalq «Ehtiyat hissələri, aksessuarlar və servis avadanlıqları Sərgisi» (AutoParts) keçiriləcək və burada müvafiq məhsul və mallar təqdim olunacaq. Sərgi martın 26-29-da Heydər Əliyev adına İdman və Sərgi kompleksində keçiriləcək.
Bundan başqa, aprelin 16-18-də Bakıda VIII Azərbaycan Beynəlxalq Turizm və Səyahətlər Sərgisi (AITF) keçiriləcək. AITF ilə paralel III Qafqaz Beynəlxalq Mehmanxana, Restoran və Supermarketlər üçün hər növ məhsullar Sərgisi (HOREX) keçiriləcək.
Cari ilin may ayının 25-27-də Bakıda Azərbaycan Beynəlxalq Qida Sənayesi (WorldFood Azerbaijan), iyunun 2-5-də VIII Beynəlxalq Nəqliyyat, Tranzit və Logistika, həmin tarixdə Beynəlxalq Xəzər Nefti və Qazı, Neft emalı və Neftkimya (Caspian Oil&Gas) sərgiləri keçiriləcək.
Bununla yanaşı, «Iteca Caspian»ın təşkilatçılığı ilə Tiflisdə (Gürcüstan) 3 sərgi layihəsi keçiriləcək. Bunlar, VIII Gürcüstan Beynəlxalq Neft və Qaz, Energetika və İnfrastruktur Konfransı (aprelin 2-3-də), VI Beynəlxalq Bankçılıq və Maliyyə Sərgisi (mayın 19-20-də) və VI Gürcüstan Beynəlxalq İnşaat Sərgisidir (iyunun 11-13-də).