Sənaye və energetika

Ana səhifə

Azərbaycan İrana qaz ixracına fevral ayının sonunda başlayacaq

12 fevral 2010 11:43 (UTC +04:00)

Bakı – APA-Economics. Azərbaycan hələlik İrana qaz ixracına başlamayıb. “APA-Economics”in məlumatına görə, bu açıqlamanı “Azəriqaz” İstehsalat Birliyinin direktor müavini Nazim Səmədzadə bu gün keçirdiyi mətbuat konfransında səsləndirib.

Onun sözlərinə görə, buna səbəb İran tərəfi ilə dəqiqləşdirmələrin aparılmasıdır. Bu proses başa çatdıqdan sonra bu ayın sonundan etibarən Azərbaycan qazı İrana ixrac olunacaq.

N.Səmədzadə qeyd edib ki, hazırda Azərbaycanın gündəlik ixrac etdiyi qazın həcmi 4,6 mln. kubmetr təşkil edir: “Bunun 1,9 mln. kubmetri Gürcüstana, 1,5 mln. kubmetri Rusiyaya, 1,2 mln. kubmetri İran vasitəsilə Naxçıvan Muxtar Respublikasına ixrac olunur. Bu ilin yanvarında imzalanmış müqaviləyə əsasən Azərbaycan İrana sutkada 1,2-1,3 mln. kubmetr qaz ixrac edəcək. Bu isə o deməkdir ki, ixracat qazının həcmi 5,9 mln. kubmetrə çatacaq”.

Xatırladaq ki, bu il yanvarın 13-də Bakıda Azərbaycanla İran arasında 2010-cu ilin yanvar-aprel dövrünü əhatə edən qısamüddətli müqavilə imzalanıb. Müqaviləni Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev və İran Milli Qaz Şirkətinin “Qaz Export” kompaniyasının baş direktoru Seyid Rza Kesaizadə imzalayıblar.

Rövnəq Abdullayev bildirib ki, müqavilə çərçivəsində Azərbaycan qış mövsümündə İrana sutkada 1,2 mln. kubmetr həcmində təbii qaz ixrac edəcək. Bu qaz hesabına İranın şimal bölgələrinin qaz təminatı yaxşılaşdırılacaq.

Seyid Rza Kesaizadə isə qeyd edib ki, hazırda tərəflər arasında qaz alqı-satqısına dair uzunmüddətli müqavilə hazırlanır. İran Azərbaycandan qazın nəqli üçün imkanlara malikdir və bu müqavilənin imzalanması tərəflər arasında əməkdaşlığı dərinləşdirəcək.

«Azərbaycanın mövcud qaz kəmərləri və Astaradakı kompressor stansiyası İrana daha çox qaz nəqlinə imkan vermir. Bu il Hacıqabul-Astara istiqamətində xətlərin və Astara kompressor stansiyasının yenidən qurulması və gücünün artırılmasına 100 mln. manat investisiya yatırmağı planlaşdırırıq», - deyə R.Abdullayev vurğulayıb.

ARDNŞ prezidenti bildirib ki, mövcud infrastruktur yenidən qurulandan sonra cari ilin payızından Azərbaycan İrana sutkada 3-5 mln. kubmetr qaz nəql etmək imkanına malik olacaq. Müqavilə çərçivəsində ümumilikdə İrana 500 mln. kub metr qazın satışı nəzərdə tutulub. Qazın qiyməti formula üzrə müəyyənləşdiriləcək.

Azərbaycanla İran arasında qaz alqı-satqısına dair uzunmüddətli müqavilənin cari ilin yay aylarında imzalanması planlaşdırılır.

Seyid Rza Kesaizadə isə qeyd edib ki, İranın mövcud infrastrukturu Azərbaycandan daha çox qaz nəql etmək imkanına malikdir.