Sənaye və energetika

Ana səhifə

DEPA prezidenti: İki ildən sonra Azərbaycandan Yunanıstana qaz nəqlinin həcminin əhəmiyyətli dərəcədə artırılmasını gözləyirik

04 iyun 2010 10:27 (UTC +04:00)

Bu barədə APA-ya Bakıda səfərdə olan Yunanıstanın DEPA şirkətinin prezidenti Harris Saçinis bildirib.

O qeyd edib ki, DEPA və ARDNŞ sıx əməkdaşlıq edir: “Hazırda Azərbaycan qazı Yunanıstana Türkiyə vasitəsilə ixrac olunur. Bu gün ixracın həcmi 700 mln. kubmetr təşkil edir. Ümid edirik ki, Azərbaycanla Türkiyə arasında razılaşma imzalandıqdan sonra DEPA ilə ARDNŞ arasında birbaşa əlaqələrin qurulması mümkün olacaq. Çünki bu gün aldığımız Azərbaycan qazı DEPA və Türkiyənin BOTAŞ şirkəti arasındakı müqavilə əsasında nəql olunur”.

DEPA prezidenti Aərbaycandan əlavə həcmdə qaz idxal etməkdə maraqlı olduqlarını bildirib: “Yunanıstanda baş verən maliyyə böhranı səbəbindən bu il və gələn il idxal olunan qazın həcmi o qədər də çox olmayacaq. Amma iki ildən sonra Yunanıstanla Bolqarıstan arasında yeni interkonnektor hazır olan zaman Azərbaycandan Yunanıstana, Yunanıstandan isə Bolqarıstana qaz nəqlinin həcminin əhəmiyyətli dərəcədə artırılmasını gözləyirik. Hesab edirik ki, Türkiyə ilə Yunanıstan arasındakı mövcud interkonnektor və Yunanıstanla Bolqarıstan arasında iki ildən sonra hazır olacaq interkonnektor Azərbaycana nəinki Yunanıstana, eləcə də Cənub-Şərqi Avropaya qaz ixrac etmək imkanı verəcək”.

H.Saçinis TGİ layihəsini Avropaya qaz nəqli üzrə digər enerji layihələri ilə müqayisədə daha perspektivli saydığını vurğulayıb: “Bir faktı qeyd etmək istərdim ki, TGİ layihəsi üçün yeni qaz yatağının işlənməsini gözləməyə ehtiyac yoxdur. “Şahdəniz-2” layihəsi üzrə hasil olunacaq həcm TGİ layihəsi üçün ideal səviyyədə uyğun gəlir”. O, “Şahdəniz-2” layihəsi üzrə ARDNŞ ilə sıx əməkdaşlığa ümid etdiklərini deyərək bildirib ki, TGİ layihəsi Azərbaycan qazını bu yataqdan Apenin yarımadası vasitəsilə İtaliya və Avropaya nəql etməyə imkan verəcək.

APA-nın “DEPA ARDNŞ ilə birbaşa müqaviləni nə vaxt imzalamağı planlaşdırır” sualına cavab olaraq H.Saçinis şirkətlərin bu məsələ ilə bağlı sıx əməkdaşlıq etdiklərini söyləyib: “İmzalanacaq razılaşmanın tipi Azərbaycan və Türkiyə arasındakı danışıqların nəticəsindən asılıdır. Bu, hazırda idxal etdiyimiz qazın həcminə aid ola, eləcə də gələcəkdə qaz idxal etməyimiz üçün qısamüddətli və ya “Şahdəniz-2” layihəsi üzrə uzunmüddətli müqavilə ola bilər”.