Sənaye və energetika

Ana səhifə

«Wartsila» şirkəti Azərbaycan üçün yeni geniş təqdimat keçirəcək

07 iyun 2010 07:16 (UTC +04:00)

Bakı. Nicat Mustafayev – APA-Economics. Bu ilin iyunun 9-da Bakıda Azərbaycan Sənaye və Energetika Nazirliyi ilə Finlandiyanın «Wartsila» şirkətinin vitse-prezidenti Kristof Vitzsumun rəhbərlik etdiyi nümayəndə heyəti arasında geniştərkibli görüş keçiriləcək.

Nazirlikdən «APA-Economics»ə verilən məlumata görə, görüşdə əsas məqsəd «Wartsila» şirkətinin fəaliyyət istiqamətləri üzrə ən müasir texnologiyalara əsaslanan işlərin təqdimatının keçirilməsidir. Görüşdə Fövqəladə Hallar Nazirliyi, Müdafiə Nazirliyi, Müdafiə Sənayesi Nazirliyi, Səhiyyə Nazirliyi, Dövlət Sərhəd Xidməti, Dövlət Neft Şirkəti, «Azərenerji» ASC, Xəzər Gəmiçiliyi İdarəsi, «Azəristiliktəchizat» ASC, Bakı Metropoliteni və digər dövlət qurumlarının aidiyyatı baş mütəxəsisləri iştirak edəcəklər.

Qeyd edək ki, «Wartsila» şirkəti 2005-ci ildən 2010-cu ilə qədər Azərbaycan ərazisində ümumi gücü 880 MVt olan modul elektrik stansiyalarının tikilməsi və istismara verilməsi layihələrini uğurla başa çatdırıb. Həmçinin, şirkət neft və qaz kompressor avadanlığı, gəmiqayırma, istilik sistemləri kimi sahələrdə böyük təcrübəyə malikdir. «Wartsila»nın avadanlıqları Bakı-Tiflis-Ceyhan əsas ixrac neft boru kəməri kimi layihələrin həyata keçirilməsində müsbət rol oynayıb. Eyni zamanda, şirkət mühərrik, avtomatika və enerji paylayıcı sistemlər də daxil olmaqla gəmiçilik sahəsindəki dəniz sənayesini əhatə edir. Şirkət Azərbaycanda əsasən neft və qaz sənayesi, elektrik enerjisi hasilatı, dəniz daşımları sahəsində fəaliyyətlə məşğuldur. Şirkət 10 ildir ki, Azərbaycanda fəaliyyət göstərir və hazırda işçilərinin sayı 90 nəfərə yaxındır.

Hazırda Azərbaycanda «Wartsila»nın 880 MVt ümumi gücə malik yeddi elektrik stansiyası (Astara, Bakı, Xaçmaz, Naxçıvan, Şəki, Quba və Sənqəçal) fəaliyyət göstərir. Xatırladaq ki, «Wartsila» şirkətinin 70 ölkədə 160 törəmə şirkəti mövcuddur, şirkətin işçilərinin ümumi sayı 18 min nəfər, 2009-cu ildə xalis satışı isə 5,3 mlrd. avro təşkil edib.