Sənaye və energetika

Ana səhifə

Azərbaycan Dövlət Neft Şirkəti və Azərbaycan Milli Elmlər Akademiyası əməkdaşlığı gücləndirir

11 iyun 2010 07:20 (UTC +04:00)

Bakı. Rəşad Süleymanov – APA-Economics. Azərbaycan Respublikası Dövlət Neft Şirkətinin (ARDNŞ) «Azərikimya» İstehsalat Birliyinin rəhbərliyi Azərbaycan Milli Elmlər Akademiyasının (AMEA) prezidenti Mahmud Kərimovla görüşüb. Bu barədə «APA-Economics»ə ARDNŞ-dən məlumat verilib.

Son illər Azərbaycan alimlərinin elmi-tədqiqat işlərinin nəticəsi olan bir çox texnologiya və avadanlıqların xarici ölkələrdə də tətbiq edildiyini deyən M.Kərimov dünya miqyasında kimya məhsullarına və onların keyfiyyətinə tələbatın artdığı bir zamanda elm və istehsalatın əlaqələrinin daha da genişləndirilməsinə xüsusi ehtiyac olduğunu söyləyib.

Görüşdə qeyd olunub ki, bu gün dünya bazarında müxtəlif çeşidli kimya məhsullarına tələbatın artması ilə yanaşı, avadanlıqların keyfiyyətinin yüksəldilməsinə, dünya standartları səviyyəsinə çatdırılmasına ciddi ehtiyac duyulur. «Azərikimya» müəssisələrinin yenidən, müasir tələblərə uyğun qurulmasında bu gün bir çox qabaqcıl ölkələrin mütərəqqi texnologiyalarının tətbiqi ilə yanaşı Azərbaycanın tanınmış elm xadimlərinin elmi ixtiralarının istehsalata geniş yol açmasının vacibliyi nəzərə çatdırılıb.

AMEA əməkdaşlarının elmi ixtira və kəşflərinin Sumqayıtın kimya müəssisələrində tətbiqinin vacibliyi vurğulanıb. AMEA və «Azərikimya» İB arasında əlaqələrinin daha da genişləndirilməsi məqsədi ilə gələcəkdə Sumqayıtda tanınmış kimyaçı alimlərin iştirakı ilə səyyar elmi-texniki müşavirələrin keçirilməsi, şəhərin kimya sənayesi kompleksinin problemlərinin və onların aradan qaldırılması yollarının birgə araşdırılması qərara alınıb.