Sənaye və energetika

Ana səhifə

BP-nin Meksika körfəzindəki neft axını ilə bağlı məcmu xərcləri 1,6 mlrd. dolları ötüb

14 iyun 2010 11:09 (UTC +04:00)

Bakı. Nicat Mustafayev – APA-Economic. BP şirkətinin Meksika körfəzində neft axınının qarşısını almaq üçün çəkdiyi xərclərin ümumi həcmi 1,6 mlrd. ABŞ dollarını keçib.
«APA-Economics»in BBC-yə istinadən verdiyi məlumata görə, bu məbləğ əsasən quyunun hermetizasiyası (bağlanmasına) və iddiaların ödənilməsinə sərf olunub. Bununla yanaşı, xərclərə BP şirkətinin Florida, Alabama, Missisipi və Luiziana ştatlarına ödənişlər daxildir. Şirkətin Direktorlar Şurası yaxın zamanlarda BP-nin səhmdarlarına dividentlərin ödənilməsinin ləğv edilməsi məsələsini müzakirə etmək niyyətindədir. Bundan bir qədər öncə BP şirkəti 2010-cu ilin II rübü üçün dividentlərin ləğvi barədə xəbər yayılmışdır ki, divident barədə yekun qərar iyulun 27-də qəbul olunacaq. Ümumiyyətlə, şirkət 2009-cu il üçün səhmdarlara 10 mlrd. dollar həcmində divident ödəməyi planlaşdırır.
Qeyd edək ki, iyunun 16-da BP şirkətinin rəhbərliyi ABŞ prezidenti Barak Obama ilə görüş keçirəcək.
Xatırladaq ki, Meksika körfəzində neftin axması aprelin 22-də başlayıb. İki gün davam edən yanğın nəticəsində 11 nəfər həlak olub, «Deepwater Horizon» platforması isə bataraq suyun altında qalıb. Neftin suya axması nəticəsində neft ləkəsi əmələ gəlib ki, bu da Luiziana ştatının sahillərinədək çatıb. İyunun 3-də BP şirkəti neft axınının qarşısını ala bilib.