Sənaye və energetika

Ana səhifə

ARDNŞ-nin Geofizika və Geologiya İdarəsi bir neçə strukturda 2D seysmik kəşfiyyat işləri aparır

18 iyun 2010 14:07 (UTC +04:00)

Bakı. Rəşad Süleymanov - APA-Economics. Azərbaycan Dövlət Neft Şirkətinin (ARDNŞ) Geofizika və Geologiya İdarəsi bir neçə perspektivli strukturda 2D seysmik kəşfiyyat işləri aparır. Bu barədə «APA-Economics»ə ARDNŞ-dən məlumat verilib.

Şirkətdən verilən məlumata görə, cari ilin mart ayından Geofizika və Geologiya İdarəsinin “Kəşfiyyatgeofizika” İdarəsi “Azneft” İstehsalat Birliyinin sifarişi ilə “Cahandar-Tərsdəllər-Borsunlu” regional profil xətti boyunca Mezokaynozoy çöküntülərinin tektonik quruluşunun dəqiqləşdirilməsi, müxtəlif yaşlı çöküntü komplekslərində dəyişilmələrin öyrənilməsi, “Kür-Qabırrı” çaylararası neftli-qazlı rayonunun geoloji modelinin qurulması məqsədi ilə 2D çöl seysmik kəşfiyyat işlərinə başlayıb. Aparılacaq əlavə tədqiqatlar eyni zamanda “Tərsdəllər” və “Cahandar” strukturlarının tektonik quruluşlarının dəqiqləşdirilməsi, müxtəlif yaşlı çöküntülər üzrə struktur xəritələrin qurulmasına xidmət edəcək. Mürəkkəb yerüstü və dərinlik seysmogeoloji şəraitə malik “Kür-Qabırrı” çaylararası neftli-qazlı rayonunda alınmış ilkin seysmik yazıların keyfiyyəti qənaətbəxş sayılıb.

Bundan başqa, “Kəşfiyyatgeofizika” İdarəsi “Azneft” İB-nin sifarişi əsasında “Gəncə” neftli-qazlı rayonunun “Naftalan-Şimali Naftalan-Gödəkboz” sahəsində ümumi dərinlik nöqtəsi və sınan dalğalar üsulları ilə 2D seysmik kəşfiyyat işlərini aparır. İşlərin görülməsində əsas məqsəd sahənin üst Təbaşir-Paleogen çöküntülərinin geoloji quruluşunun dəqiqləşdirilməsi və neftlilik-qazlılığının proqnozlaşdırılmasıdır. Alınmış məlumatların ilkın təhlili əvvəlki illərdən fərqli olaraq yüksək keyfiyyətli seysmik yazıların alındığını göstərib.