Sənaye və energetika

Ana səhifə

Azərbaycan yanvar-may aylarında neft məhsullarının 46%-ni ixrac edib

21 iyun 2010 07:14 (UTC +04:00)

Bakı. Nicat Mustafayev – APA-Economics. Bu ilin yanvar-may aylarında Azərbaycanda istehlakçılara (ixrac da daxil olmaqla) 2,5 mln. ton və ya ötən ilin eyni dövrü ilə müqayisədə 4% çox neft məhsulları göndərilib.

Dövlət Statistika Komitəsindən «APA-Economics»ə verilən məlumata görə, bunun 54,4%-i daxili bazarın tələbatının ödənilməsinə yönəldilib, 45,6%-i isə ixrac olunub.

Neft məhsullarının 40,3%-ni dizel yanacağı, 18%-ni avtomobil benzini, 9,7%-ni aviasiya üçün və sair ağ neft, 4,1%-ni mayeləşdirilmiş qazlar, 3,4%-ni mazut yanacağı, 2,8%-ni neftbitum, 1,1%-ni sürtkü yağları, 20,6%-ni isə digər məhsullar təşkil edib.

Hesabat dövründə ölkə istehlakçılarına 1,4 mln. ton neft emalı məhsulları göndərilib ki, 2009-cu ilin eyni dövrü ilə müqayisədə istehlakçılara aviasiya üçün və sair ağ neft 51,4%, dizel yanacağı 14,3%, avtomobil benzini 5,6% çox, neftbitum, mazut yanacağı, sürtkü yağları, mayeləşdirilmiş qazlar və digər neft məhsulları isə az göndərilib.

Qeyd edək ki, hesabat dövründə aviasiya üçün ağ neftin 95,8%-i «Azərbaycan Hava Yolları» QSC-yə və 4,2%-i digər təşkilatlara, sürtgü yağlarının 63%-i, dizel yanacağının 48,6%-i, avtomobil benzininin 17,6%-i, mazut yanacağının 8,8%-i Azərbaycan Dövlət Neft Şirkətinin Marketinq və İqtisadi Əməliyyat İdarəsinə, avtomobil benzininin 48,8%-i, dizel yanacağının 25%-i «Azpetrol Holding»a, avtomobil benzininin 15,6%-i, dizel yanacağının 11,6%-i «LUKoil» ASC-yə, avtomobil benzininin 18%-i, dizel yanacağının 11,9%-i «SOCAR Petroleum» QSC-yə, sürtgü yağlarının 4,6%-i, dizel yanacağının 2,8%-i Dövlət Xəzər Dəniz Gəmiçiliyinə, sürtgü yağlarının 7,7%-i, mazut yanacağının 5,6%-i Naxçıvan Neft və Qaz MTM-ə, dizel yanacağının 0,1%-i, sürtgü yağlarının 24,7%-i, mazut yanacağının 85,6%-i isə digər təşkilatlara göndərilib.