Sənaye və energetika

Ana səhifə

“Qazprom” şirkəti Belarusa qaz borcunu ödəmək üçün əlavə vaxt verməkdən imtina edib

22 iyun 2010 08:05 (UTC +04:00)

Bakı - APA-Economics. Rusiyanın “Qazprom” şirkəti Belarusun qaz borcunu ödəmək üçün iki həftə əlavə vaxt verilməsi xahişini rədd edib.

“APA-Economics”in “RİA Novosti”yə istinadən məlumatına görə, bu barədə konsernin rəsmi nümayəndəsi Sergey Kupriyanov bildirib.

“Hələlik qaz nəqlinin həcmində dəyişiklik yoxdur. Amma 15% hələ başlanğıcdır. Kimsə onları iki həftə gözləməyəcək” - deyə S.Kupriyanov qeyd edib. Onun sözlərinə görə, Rusiya və Belarus arasında qaz danışıqlarının növbəti raundu bu gün davam etdiriləcək.

Xatırladaq ki, Belarus baş nazirinin müavini Vladimir Semaşko Rusiyadan alına qaza görə yaranmış borcu iki həftə ərzində ödəyəcəklərini bəyan edib və “Qazprom”dan bunun üçün vaxt istəyib. O, qaz borcunu ödəmək üçün borc alacaqlarını vurğulayıb: “Çünki valyuta ilə bağlı problemlərimiz var”.

Öz növbəsində Belarus Milli Bankının keçmiş sədri Stanislav Boqdankeviç bəyan edib ki, ölkəsi istəsə, Rusiyaya olan qaz borcunu operativ şəkildə ödəyə bilər: “Bu gün Belarus Milli Bankı 6 milyard dollar ehtiyata malikdir. Sadəcə, Belarus rublunu birjada dollara çevirmək lazımdır”.

Qeyd edək ki, iyunun 21-dən etibarən Rusiyadan Belarusa qaz nəqlinin azaldılmasına başlanıb. Məhdudlaşdırma ilk vaxtlar 15%-lə həyata keçiriləcək, lakin bu göstərici 85%-dək artırıla bilər. Hazırda Belarusun Rusiyadan aldığı qaza görə borcu müxtəlif hesablamalara əsasən 140-200 mln. dollar təşkil edir. Belarus tərəfi borcunu inkar etmir, amma ödənişin maşınlarla, avadanlıqlarla və digər növ məhsullarla həyata keçirilməsini təklif edir.