Sənaye və energetika

Ana səhifə

Avstriyanın iqtisadiyyat, ailə və gənclər məsələləri üzrə federal naziri ARDNŞ-də görüş keçirib

24 iyun 2010 09:05 (UTC +04:00)

Bakı. Rəşad Süleymanov - APA-Economics. Azərbaycan Dövlət Neft Şirkətində (ARDNŞ) Bakıda səfərdə olan Avstriyanın iqtisadiyyat, ailə və gənclər məsələləri üzrə federal naziri Reinhold Mitterlenherin başçılıq etdiyi nümayəndə heyəti ilə görüş keçirilib.

ARDNŞ-in sərmayələr və marketinq üzrə vitse-prezidenti Elşad Nəsirov son illər Avstriya şirkətləri ilə ARDNŞ arasında işgüzar münasibətlərin yarandığını və bu əlaqələrin dövlətlərarası münasibətlərin inkişafına xidmət etdiyini vurğulayıb. E.Nəsirov Azərbaycanda həyata keçirilən regional əhəmiyyətli neft-qaz layihələri haqqında məlumat verərək bildirib ki, ötən dövrdə Azərbaycanda şaxələndirilmiş ixrac neft və qaz kəmərləri sistemi yaradılıb.

R.Mitterlenher ölkəsinin Xəzər dənizi hövzəsində hasil olunan təbii qazın Avropaya nəql edilməsini nəzərdə tutan «Nabucco» qaz kəməri layihəsini dəstəklədiyini söyləyib. Son illər “Şahdəniz”, “Azəri-Çıraq-Günəşli” layihələri çərçivəsində və ARDNŞ-in müstəqil işlədiyi yataqlarda görülən tədbirlər nəticəsində Azərbaycanda təbii qaz hasilatının yüksəldiyini qeyd edən ARDNŞ nümayəndələri isə Azərbaycanın “Cənub dəhlizi” layihəsinə tərəfdar olduğunu xatırladıb. Həmin layihə üzrə mövcud qaz kəmərləri variantlarının ARDNŞ-də ciddi şəkildə nəzərdən keçirildiyini bildirib.

Qeyd edək ki, Avstriya nümayəndə heyətində OMV, “Mbh CİS” “AG CİS”, “Herz Armaturen GesmbH”, BHDT və başqa Avstriya şirkətlərinin nümayəndələri təmsil olunub.