Sənaye və energetika

Ana səhifə

Azərbaycanda mənfəət neftinin hasilatı 35 dəfə artacaq

06 iyul 2010 11:14 (UTC +04:00)

Bakı. Nicat Mustafayev - APA-Economics. Bu ilin sonuna Xəzərin Azərbaycan sektorunda yerləşən «Azəri-Çıraq-Günəşli» (AÇG) yataqlar blokunda neftinin hasilatın 17,7 dəfə artacağı proqnozlaşdırılır.

Dövlət Neft Şirkətindən «APA-Economics»ə verilən məlumata görə, əgər 1998-ci ildə AÇG üzrə hasilatın həcmi 2,37 mln. ton təşkil edirdisə, artıq 2010-cu ilin sonuna bu göstəricilərin müvafiq olaraq 42 mln. ton təşkil edəcəyi gözlənilir. Nəticədə son 13 il ərzində AÇG üzrə ümumi neft hasilatı 17,7 dəfə artacaq.

Mənfəət neftinə gəldikdə, son 11 il ərzində onun həcminin 35 dəfə artacağı gözlənilir. Belə ki, əgər 2000-ci ildə mənfəət neftinin həcmi 0,83 mln. ton təşkil edirdisə, cari ilin sonuna bu göstəricinin 29 mln. tona çatacağı gözlənilir.

Ötən illə müqayisədə 2010-cu ilin sonuna AÇG üzrə neft hasilatı 4,5%, Azərbaycanın mənfəət neftinin isə 6,6% artacağı gözlənilir.

Qeyd edək ki, AÇG yataqlarının işlənməsi layihəsində BP (operator - 34,1%), «Chevron» (10,2%), ARDNŞ (10%), «Inpex» (10%), «Statoil» (8,6%), «ExxonMobil» (8%), TPAO (6,8%), «Devon» (5,6%), «Itochu» (3,9%) və «Hess» (2,7%) şirkətləri iştirak edir.