Sənaye və energetika

Ana səhifə

Azərbaycan Dövlət Neft Şirkəti «Şahdəniz» konsorsiumundan əvvəl Avropaya qaz ixracına başlaya bilər

16 noyabr 2011 08:24 (UTC +04:00)

«APA-Economics»in xəbərinə görə, bunu ARDNŞ prezidentinin müşaviri Murad Heydərov bildirib.

Onun sözlərinə görə, Azərbaycan qazının Avropaya nəqli «Şahdəniz-2» layihəsinin işə düşməsindən (2017-ci ildən) əvvəl reallaşa bilər: «Söhbət ARDNŞ-ın öz yataqlarından çıxarılan qazın Avropaya nəqlindən gedir. Yəni, şirkət öz yataqlarından «Şahdəniz» konsorsiumundan əvvəl qaz çıxara bilər. Kifayət qədər nəql imkanları olsa, bu zaman ARDNŞ kiçik həcmdə olsa belə, 2017-ci ildən əvvəl qazı Avropaya ötürə biləcək».

Müşavir qeyd edib ki, hazırda bir sıra Cənub-Şərqi Avropa ölkələri öz enerji təhlükəsizliklərini təmin etmək üçün Azərbaycan qazını almaqda maraqlıdır. Bu, Bolqarıstan, Rumıniya, Macarıstan, Serbiya və s. ölkələrdir. Erkən qazın ilk real alıcısı isə Bolqarıstan ola bilər. Çünki Azərbaycanla Bolqarıstan arasında artıq bununla bağlı memorandum imzalanıb. Erkən qaz nəqlinin həcmlərinə gəlincə, söhbət ilk növbədə 1 mlrd. kubmetr qazdan gedir: «İndi biz bu məsələni bolqarlarla müzakirə edirik, sonra bura Rumıniya da əlavə oluna bilər, qalan ölkələr isə nəzəri olaraq bu məsələdə maraqlı ola bilərlər».

M.Heydərovun sözlərinə görə, hələlik erkən qaz nəqlinin nə vaxt başlanacağı dəqiqləşməyib: «Bu, texniki məsələlərdən, xüsusilə də Bakı-Tiflis-Ərzurum kəmərinin əlavə qaz həcmlərinin ixracına hazır olmasından asılıdır». Hazırda bu kəmərlə «Şahdəniz-1» layihəsi çərçivəsində hasil olunan qaz ixrac edilir.

Xatırladaq ki, son bir ildə Azərbaycanda «Ümid» və «Abşeron» qaz yataqları kəşf olunub, hər iki yataqda kəşfiyyat işləri ARDNŞ-ın hesabına aparılır.

Belə ki, 200 mlrd. kubmetr qaz və 30-40 mln. ton kondensat ehtiyatı olan «Ümid» yatağı ehtiyatlarının həcminə görə «Şahdəniz»dən sonra Azərbaycanın müstəqilliyi tarixində kəşf olunan ikinci böyük qaz yatağıdır. Bazardakı mövcud qiymətləri nəzərə alanda, «Ümid» yatağında tapılan ehtiyatların ümumi dəyəri 30-40 mlrd. dollar təşkil edir.

«Abşeron» yatağındakı potensial ehtiyatların həcmi 350 mlrd. kubmetr qaz və 45 mln. ton kondensat təşkil edir.

Nəticədə Azərbaycanın təsdiq olunmuş qaz ehtiyatlarının ümumi həcmi 2,55 trln. kubmetrə çatıb.