Sənaye və energetika

Ana səhifə

Yaponiyanın aparıcı korporasiyaları Azərbaycanda əməkdaşlıqda maraqlıdır

24 noyabr 2011 08:06 (UTC +04:00)

Bakı. Vahab Rzayev – APA-Economics. Azərbaycan Dövlət Neft Şirkətinin (ARDNŞ) prezidenti Rövnəq Abdullayev Azərbaycan-Yaponiya hökumətlərarası komissiyasının həmsədri, «Itochu» Korporasiyasının icraçı vitse-prezidenti Yoiçi Kobayaşinin başçılıq etdiyi nümayəndə heyətini qəbul edib. ARDNŞ-dan «APA-Economics»ə verilən məlumata görə, R.Abdullayev Azərbaycan və Yaponiya arasında ikitərəfli münasibətlərin yüksək səviyyədə inkişaf etdiyini bildirib və bu əməkdaşlığın gələcəkdə daha da genişlənəcəyinə əmin olduğunu söyləyib.

R.Abdullayev Yaponiya ilə əməkdaşlıq sahələri arasında enerji, neft-qaz hasilatı istiqamətlərinin xüsusi yer tutduğunu qeyd edib və bildirib ki, Xəzər dənizinin karbohidrogen ehtiyatlarının işlənməsi üzrə müxtəlif neft-qaz əməliyyatlarında dost ölkənin şirkətləri fəal iştirak edir. «Itochu» Korporasiyasının icraçı vitse-prezidenti Y.Kobayaşi isə qeyd edib ki, Azərbaycan-Yaponiya hökumətlərarası komissiyasının Bakıda keçirilmiş 7-ci iclası iki ölkə arasında əməkdaşlığın daha da möhkəmlənəcəyinə xidmət edəcək.

Nümayəndə heyətinə üzv olan «Itochu», «Mitsubishi», «Rotobo», «Marubeni» kimi iri Yaponiya korporasiyalarının təmsilçiləri Azərbaycanla müxtəlif sahələrdə əməkdaşlıq etməkdə maraqlı olduqlarını bildiriblər.

Regional əhəmiyyətli layihələr haqqında ətraflı məlumat verən ARDNŞ prezidenti yeni yataqların kəşf olunmasından, ölkə daxilində və xaricdə aparılan investisiya layihələrindən danışıb. O, Yaponiya şirkətləri ilə ARDNŞ arasında yaranmış səmərəli əməkdaşlıq münasibətlərinin bundan sonra da inkişaf edəcəyinə əminliyini bildirib.

Görüşdə Yaponiyanın Azərbaycandakı və Azərbaycanın Yaponiyadakı səfirləri də iştirak ediblər.