Sənaye və energetika

Ana səhifə

Xarici şirkətlər və dövlətlər də Trans Anadolu Boru Kəməri layihəsində pay almaq istəyir

04 aprel 2012 10:11 (UTC +04:00)

«APA-Economics»in məlumatına görə, bunu Azərbaycan Dövlət Neft Şirkətinin (ARDNŞ) prezidenti Rövnəq Abdullayev bildirib.

Onun sözlərinə görə, TANAP layihəsində pay bölgüsü ilə bağlı Türkiyə və Azərbaycan arasında memorandum imzalanıb: «Uzun danışıqlardan sonra Türkiyənin energetika naziri ilə birlikdə imzalanmış memoranduma görə, layihədə Azərbaycan 80%, Türkiyə isə 20% paya malikdir. Və bununla bağlı nə Türkiyə, nə də Azərbaycan tərəfindən yeni məsələ qaldırılmayıb».

ARDNŞ prezidenti bildirib ki, Azərbaycanın layihədəki 80%-lik payının bir hissəsi Azərbaycanda fəaliyyət göstərən qaz şirkətlərinə verilə bilər: «Biz belə şirkətləri layihəyə dəvət etmişik, onlar bu layihədə iştirak etmək istəyir və hamısı arzularını bildirib».

R.Abdullayevin sözlərinə görə, layihədən kimə nə qədər pay veriləcəyi isə bir qədər sonra, Azərbaycanla Türkiyə arasında TANAP-ın tikintisi ilə bağlı hökumətlərarası saziş imzalanandan sonra müəyyənləşdiriləcək. Artıq Azərbaycanda qaz hasilatında iştirak edən bütün iri şirkətlər, o cümlədən BP, «Statoil», «Total» və başqaları bu layihədə pay almaq arzusunda olduqlarını açıqlayıb. R.Abdullayev vurğulayıb ki, hətta bəzi xarici dövlətlər bu layihədə iştirak payı almaq istədiklərini bildirib və bunlardan biri Ukraynadır: «Biz kimə nə qədər payın verilməsinə baxacağıq. Bunun üçün tələblər olacaq, paylar sadəcə verilməyəcək. Burada hansı şirkətin nə qədər qazı olacağı nəzərə alınacaq və həmin qazı bu kəmərlə ixrac edən şirkətlərə pay veriləcək».

ARDNŞ başçısı əlavə edib ki, Azərbaycanın bu layihədəki payının həcmi ilə bağlı hər hansı minimal hədd nəzərdə tutulmayıb: «Biz belə hədd nəzərdə tutmuruq, bizim üçün əsas məsələ boru xəttində operatorluğu və nəzarəti özümüzdə saxlamaqdır, payın neçə faiz olmasının buna aidiyyəti yoxdur. Paylar o şərtlə bölünəcək ki, kəmərə nəzarət bizdə qalsın».