Sənaye və energetika

Ana səhifə

ARDNŞ prezidenti «Dow Chemical» şirkətinin regional meneceri ilə görüşüb

11 aprel 2012 12:28 (UTC +04:00)

Bakı. Nicat Mustafayev – APA-Economics. Azərbaycan Dövlət Neft Şirkətinin (ARDNŞ) prezidenti Rövnəq Abdullayev Bakıda səfərdə olan «Dow Chemical» şirkətinin Türkiyə və Mərkəzi Asiya üzrə baş meneceri İhsan Necipoğlu və onun başçılıq etdiyi heyətlə görüşüb.
ARDNŞ-dan «APA-Economics»ə verilən məlumata görə, görüş zamanı 1990-cı illərindən bəri Azərbaycanın neft-qaz sənayesində əldə olunmuş uğurlardan söz açan R.Abdullayev bu nailiyyətlərin əsasının yeni neft strategiyası ilə qoyulduğunu qeyd edib. Azərbaycan neft-kimya sənayesinin inkişafından bəhs edən R.Abdullayev Sumqayıt şəhərində yeni kimya-sənaye parkının yaradılması barədə danışıb və qeyd edib ki, bunun başlıca məqsədi mövcud xammal əsasında son istifadə məhsulları istehsal etməkdir. Azərbaycanda kimya sənayesi üçün geniş xammal bazasının mövcud olduğunu deyən R.Abdullayev son illər kəşf olunmuş yeni qaz yataqlarından danışıb. ARDNŞ-ın yeni Neft-qaz emalı və neft-kimya Kompleksinin ölkənin və regionun inkişafında böyük rol oynayacağını deyən ARDNŞ prezidenti həmin kompleksin layihələndirmə və inşa işlərində bu sahədə tanınmış xarici şirkətlərin iştirakının böyük əhəmiyyət kəsb etdiyini bildirib.
Öz növbəsində İ.Necipoğlu ARDNŞ-ın yeni Neft-qaz emalı və neft-kimya Kompleksi layihəsini yüksək qiymətləndirib, «Dow Chemical»ın kimya elmini innovasiyalar və davamlı inkişaf prinsipi ilə birləşdirməklə müasir texnologiyaya əsaslanan istehsal sahələri quraraq elektronika, kənd təsərrüfatı, enerji sektorlarında məhsullar təklif etdiyini bildirib. İ.Necipoğlu qeyd edib ki, şirkətin 36 ölkəyə 5 min adda məhsul istehsal edən müəssisələri var. Azərbaycanda inşa olunacaq yeni Neft-qaz emalı və neft-kimya Kompleksinə böyük maraq olduğunu deyən qonaq bu layihənin inkişafında təmsil etdiyi şirkətin lisenziya və texnologiya sahələrində dəstək verə biləcəyini deyib. O, «Dow Chemical»ın ARDNŞ-la həm Azərbaycanda həyata keçiriləcək layihələr, həm də «Petkim» neft-kimya holdinqinin inkişaf konsepsiyası çərçivəsində görüləcək işlərdə əməkdaşlıq münasibətlərinin qurulmasında maraqlı olduğunu söyləyib.