Bakı. Cavid Zeynallı – APA. Memarlar İttifaqının təşkilatçılığı, Mədəniyyət və Turizm Nazirliyinin və Beynəlxalq Memarlar İttifaqının dəstəyi ilə “İkinci Bakı Beynəlxalq Memarlıq Mükafatı” müsabiqəsi keçiriləcək.
Mədəniyyət və Turizm Nazirliyinin informasiya və ictimaiyyətlə əlaqələr şöbəsindən APA-ya verilən məlumata görə, müsabiqə çərçivəsində təqdim olunmuş işlərin sərgisi nümayiş etdiriləcək.
Sərginin açılış mərasimi oktyabrın 8-də Muzey Mərkəzində olacaq.
Mükafat fondu 52500 manat təşkil edən müsabiqənin nəticələri oktyabrın 9-da Bakıda keçiriləcək təntənəli mərasimdə elan ediləcək. Beynəlxalq Memarlar İttifaqının nümayəndə heyətinə təşkilatın baş katibi, I Bakı Beynəlxalq Memarlıq Müsabiqəsinin Münsiflər heyətinin sədri Tomas Voiner rəhbərlik edəcək.
Müsabiqənin yekununda təqdim edilmiş bütün layihələrdən ibarət xüsusi kataloq nəşr olunacaq.