Sosial

Ana səhifə

Sosial

Ermənilər işğal altında olan Azərbaycanın Zəngilan rayonunun qiymətli ağaclarını kəsərək xarici ölkələrə satırlar

29 oktyabr 2008 12:53 (UTC +04:00)

Bakı. İlhamə İsabalayeva – APA-Economics. Azərbaycan Ekologiya və Təbii Sərvətlər Nazirliyinin «İşğal olunmuş Azərbaycan ərazilərində ətraf mühitə və təbii sərvətlərə dağıdıcı təsiri müəyyənləşdirən (izləyən) operativ mərkəz»i işğaldan sonrakı dövrlərdə Zəngilan rayon ərazisində təbii sərvətlərin ermənilər tərəfindən dağıdılmasına dair bır sıra fakt aşkarlayıb.
Nazirliyin mətbuat xidmətindən «APA-Economics»ə verilən məlumata görə, bu rayon böyük ekoloji terrora məruz qalıb. Belə ki, Ermənistan ərazisində yaranan çirkab sular mütəmadi olaraq (2,1 min kubmetr/gün) təmizlənmədən Araz çayının sol qolu olan Oxçuçay vasitəsilə birbaşa Araz çayına axıdılır. Ermənistandakı Qacaran mis-molibden, Qafan mis filizsaflaşdırma kombinatlarının kimyəvi çirkli suları və Qafan, Qacaran şəhərlərinin bioloji çirkli suları zərərsizləşdirilmədən birbaşa Oxçuçaya buraxılır ki, bu da çay hövzəsini «ölü zonaya» çevirib. Nəticədə, çay suyunda əzəldən formalaşmış mikroflora və fauna məhv olub, çayın öz-özünü təmizləmə prosesi dayanıb. Bundan əlavə, ermənilər Zəngilan meşə təsərrüfatının Topmeşə sahəsinin qoz, şərq çinarı və s. qiymətli ağaclarını tamamilə qıraraq daşıyıblar.
İşğal dövründə ermənilər dəfələrlə Bartaz və Vecnəli sahələrində olan ardıc meşələrində güclü yanğınlar törədiblər. Rayonun Meşə Təsərrüfatı İdarəsinin inzibati binası yandırılıb, binanın ətrafında olan 2 hektara yaxın çoxillik qoz, çinar, şam ağacları tamamilə qırılıb. Daş-başı və Leşkar meşələrində də ermənilər yanğın törədib, bu meşə sahəsindəki 55 hektar ərazini əhatə edən qoz meşəsinin 40-50 illik qoz ağacları, həmçinin Top və Şükürataz meşə sahəsində olan 350-400 illik yaşlı palıd ağacları ermənilər tərəfindən qırılıb daşınıb.
«Hazırda ermənilər tikinti və mebel sənayesinə yararlı çox qiymətli ağacları kütləvi şəkildə kəsərək Ermənistana aparır və xarici ölkələrə satırlar. İşğal altında olan ərazilərdə narkotik vasitələr becərilir, davamlı olaraq yanğınlar törədilir», - deyə nazirlikdən bildirilib.