Sosial

Ana səhifə

Sosial

Azərbaycanda bu il 18,6 min əmək müqaviləsinin bağlanılması təmin edilib

05 noyabr 2008 13:16 (UTC +04:00)

Bakı. İlhamə İsabalayeva – APA-Economics. Azərbaycan əmək və əhalinin sosial müdafiəsi naziri Füzuli Ələkbərov Dövlət Əmək Müfəttişliyinin rəhbər işçilərinin iştirakı ilə geniş müşavirə keçirib. Müfəttişlikdən «APA-Economics»ə verilən məlumata görə, müşavirədə Azərbaycan vətəndaşlarının əmək sahəsində hüquqlarının qorunması sahəsində DƏM-in qarşısında duran vəzifələrin icrasına dair müzakirələr aparılıb.
DƏM rəisi Nəbi Şükürlü bildirib ki, bu ilin yanvar-oktyabr ayları ərzində 1 840 müəssisəyə dövlət nəzarəti həyata keçirilib. Hesabat dövründə 2 110 ərizə və şikayətə, 1 014 məktuba baxılıb. Bu ilin ötən 10 ayı ərzində 18 640 əmək müqaviləsinin bağlanılması təmin edilib. N.Şükürlü bu ilin yanvar-sentyabr ayları ərzində isə 607 min manatdan çox gecikdirilmiş ödəncin verilməsinin təmin edildiyini söyləyib.
Müşavirəni yekunlaşdıran F.Ələkbərov qarşıya qoyulmuş məsələlərin həlli ilə bağlı tapşırıqlar verib. Nazir əcnəbilərin və ya vətəndaşlığı olmayan şəxslərin fərdi icazə almadan işə cəlb edilməsi, iqtisadiyyatın müxtəlif sahələrində, xüsusilə tikintidə işçilərlə əmək müqavilələrinin bağlanılmaması və onlara verilən əmək haqlarının qeydə alınmaması hallarına qarşı ciddi mübarizə aparılmalı olduğunu qeyd edib.